Haaland aia Messi dah sangtu Pep

Premier League chanchin chu Erling Haaland-a chanchinin a hliah khuh a, khawvela football league hautak ber tia inchhuang ve tak hi, Haaland chuan a duhthala sapatal nan a hmang a ni ber a, league match riatah goal 14 a khung tawh!

Season hmasa Premier League top scorer Son Heung-min leh Mohamed Salah ten goal 23 ve ve an khung a, match 31 khelh tur awmah Haaland hian season hmasa top scorer-te goal khung zat khung turin goal kua chiah a mamawh tawh.

Mahse, City-a amah enkawltu Pep Guardiola chuan Haaland hi Lionel Messi aiin a la dah sang duh chuang lo a, Spanish coach chuan Barcelona legend hnathawh ang chu Haaland-a'n a thawk ve thei lo niin a sawi.

Pep chuan, "Messi leh Haaland danglamna chu, Erling hi chuan tuna a tih ang ti tur hian a ṭhiante a mamawh a, Messi erawh chuan amahin a thawk chhuak thei a ni," a ti.

Barcelona boss hlui Pep hian 6-3 a Manchester United an sawp hnu lawkah he thu hi a sawi a, Manchester derby-ah Haaland hian hattrick a siam - heti chung hian Messi erawh a la dah sang zawk.

City hian zanin dar 12:30-ah Champions League match khel turin Copenhagen an mikhual dawn a, Haaland-a goal khung lai hmu tura inrin leh tawp mai chi a ni!

Group G-ah City hian match hnih khel tawhin an chak ve ve a, hma an hruai mek - Borussia Dortmund leh Sevilla an hneh tawh avangin Copenhagen lakah harsatna an tawh a rinawm lo.

Dortmund hian zanin dar 12:30-ah Sevilla an hmachhawn ve dawn bawk a, team pahnih inkhel hi last 16-a City hnungzui tur ang hialin a chhal theih ang.