MPL club-ten Khawzawl an pan ṭan

Mizorama football inelna sang ber Mizoram Premier League Season 9 round 7 chu Khawzawlah October 6-7, 2022 hian khelh a ni dawn.

October 6, Ningani hian I Day Football champion Mizoram Police-in kai thar FC Bethlehem an hmachhawn dawn. Ni khatnaah hian inelna hmahruai mektu Aizawl FC leh pahnihna Chhinga Veng te an inkhel bawk ang.

Nimin khan Police, Bethlehem, Aizawl FC leh Chhinga Veng ten Khawzawl a pan a, kawng laih avangin kalkawngah an tluang lo. Ṭha taka an khelh theih nan vawiin lamah an hahdam ṭhat a ṭul ang.

Ni hnihnaah Electric Veng leh FC Venghnuai te an inkhel dawn a, team pahnih hi an match hnuhnung berah an chak ve ve. Chanmari FC leh Chawnpui FC ten a tawp an khar dawn a, anni pahnih hi match hnuhnung pahnihah an chak lo ve ve.

Vawiin hian Electric Veng, FC Venghnuai, Chanmari FC leh Chawnpui FC ten Khawzawl panin Aizawl an chhuahsan ang. MPL hi Khawzawl hma hian Lunglei, Serchhip, Champhai leh Kolasib-ah te khelh a lo ni tawh a ni.