India chakna Mizo rawlthar

AFC Under-17 Asian Cup 2023 qualification round-a an match hmasa berah India U17 an chak nghal a, Mizo rawlthar Vanlalpeka Guite (Sentea) leh Lalhmingchhuanga Fanai ten goal khat ve ve an khung - Maldives chu 5-0 zetin an sawp.

India tan captain Sentea hian minute 11-na lekah mawi zetin goal hmahruai a khung a, minute 25-naah Hmingtea'n long range shot neiin goal net a tawn puar bawk - Sentea hian uiawm takin freekick aṭangin woodwork a pet per bawk.

Blue Tigers rawlthar rual tan Aman, Boby Singh (penalty) leh Phoenix Oinam ten goal khat ṭheuh an khung bawk a, India an chak chiang hle.

India tana captain armband hrengtu Sentea chuan, "Maldives hneh hi chu kan inring sa a, mahse, kan chak dan hi chu kan rin phak bak a ni thung. Kuwait leh Saudi Arabia te nen group khatah awm mah ila, kan qualify theih kan inring a, inthlahdah loa kan khelh a ngai a ni," tiin Vanglaini a hrilh.

AFC U17 Asian Cup 2023 qualifier-ah hian team 44 an inel a, group sawmah an inṭhen. Group A-D thleng hian group tinah team panga an awm a, group E-J thleng hian group tinah team 10 an awm.

Group tina pakhatna ṭheuh leh pahnihna zinga a ti ṭha zual paruk chu AFC U17 Asian Cup 2023 khel tur hian an tling dawn a, India hian zanin dar 12:00-ah Kuwait U17 an hmachhawn zui dawn.

India inkhel hi Indian football facebook page-ah live-a en theih a ni dawn a, Khawzawl rawlthar Sentea leh Champhai midfielder Hmingtea bakah hian Bawngkawn winger Lalpekhlua chu squad-ah an awm.