Benzema chhantu Ancelotti

Tun season kal laia Real Madrid inkhel result chu 'chak' a ni ṭhin, chak loh leh inhnehtawk a awm ngai lo. Mahse, kar tawp inkhelah an chak tluang record hi a tawp a, hun pawimawhah Karim Benzema chuan penalty a hlah.

Real Madrid coach Carlo Ancelotti chuan, "Thla khat hnuah Karim a inkhel ve leh chauh a ni a, minute 90 chhung harsatna nei loa a inkhel thei hrim hrim kha thil lawmawm tak a ni tawh.

"A hna pawh a thawk ṭha, goal khung theihna remchang pawh a hmu. Mahse, a hlah palh mai a ni. Hun ṭha a neih hunah chuan a khung leh mai ang, buaina tur a awm lo," tiin a sawi. Real Madrid president Florentino Perez pawhin an striker hi a chhan bawk.

Spanish champion an chesual hi a pawi, an hmelma Barcelona lakah La Liga hmahruaina an chan nghal bawk. Fans rilruna thawi dam theihna remchang an nei dawn, zanin dar 12:30 hian Champions League khel turin Shakhtar Donetsk an lo mikhual ang.

UCL-ah pawh Real hi champion lai tho an ni, an group match hmasa pahnihah an chak. Anmahni hnaih bertu Shaktar hi an hneh thei a nih chuan, group match hnuhnung lamah nuamsa zawka khel chungin an tlang thei ang - zaninah chak ngei an tum dawn.