Higuain a chawl dawn ta

A vanglaia European football-a striker 'hot' ber pawl ni thei Gonzalo Higuain chuan inkhelh a chawlhsan tur thu a puang a, 2022 Major League Soccer season zawh rualin a boot a khai tawh dawn.

Kum 34 mi Higuain hian kum 2020 khan David Beckham-a club Inter Miami a zawm a, October 9-ah MLS regular season khelh zawh a ni dawn - a team hi playoff khel thei dinhmunah an ding a, an khel a nih chuan a chawlh hun a tlai hret ang.

Mahse, MLS Cup final hi November 5-ah chuan khelh a ni dawn hrim hrim a, Argentine striker hian World Cup hmain inkhelh chu a chawlhsan hrim hrim dawn tihna a ni.

Higuain chuan, "Football ka mangṭha hun chu a lo thleng ta," tiin mittui nen a sawi a, "Football hian thil tam tak min pein, ka hun tawn duhawm leh hrehawm te kha, a vaiin ka chhuang em em vek a ni," a ti.

Argentina tana vawi 75 inlana goal 31 khung thei striker chuan, "Ka khelhna Palermo, River Plate, Real Madrid, Argentina, Napoli, AC Milan, Chelsea leh Inter Miami-a technical staff, min enkawltute chungah lawmthu ka sawi.

"Kan hun tawn hlimawmte kha ka rilru leh thinlungah an cham reng tawh dawn a, ka suangtuah phak baka ropui career ka hmang a, thla thum/li liam taah khan he thutlukna hi ka siam tawh," a ti.

Higuain hian World Cup 2014-ah Argentina chu final a hruai thleng a, Copa America 2015 final an khel bawk - ram tana a match hnuhnung ber chu World Cup 2018-ah khan khelin, Nigeria lakah 2-1 in an chak.

Club hrang hrang tan match 707 zet khelin goal 333 a khung a, assist vawi 113 a nei - heng zinga goal 121 chu Real Madrid tana match 264 aṭanga a khung a ni. Spanish club tan hian La Liga (3) nomawi a chawi a, Juventus tan Serie A-ah vawi thum a champion bawk.

Napoli tana a khelh laiin, 2015-16 season khan match 35 khelin goal 36 a khung a, Serie A season khata goal khung hnem ber record a ni bawk - Napoli tan hian match 146-ah goal 91 zet a khung a, Coppa Italia leh Supercoppa Italiana-ah vawi khat ve ve a champion pui.

Argentine striker hian tun season-ah league match 26 khelin goal 14 a khung a, Inter Miami manager Phil Neville chuan, "Kar engemaw zat liam taah khan a chungchang hian sawi a hlawh hle.

"Mahse, a sulhnu ropui leh hriatreng a duh dante kan sawi dun a, tlawm emaw, a nihna tak pholang turin duhthlan tur a nei - chuta ṭang chuan world class a nihzia leh mi beidawng ve ngai lo a nihzia a pholang.

"Season a la zo lo a, theihtawp chhuah a, player naupang zawkte a fuih phur zel pawh a ṭul. Huaisen takin a ding chhuak a, khelmual pawn thlenga midang a hneh theih dan hi sawi nep chi a ni lo," a ti a, a player a dah sang hle.