Relegation battle-ah Leicester City-in Nottingham an sawp
Premier League-ah Leicester City chuan chak hmel an hmu ta a, Thawhṭanni zan khan Nottingham Forest chu 4-0 in an sawp. Foxes tan hian James Maddison-a'n goal hnih a khung bakah Harvey Barnes leh Patson Daka ten goal khat ve ve an khung bawk.
Boruak a hot
Leicester City leh Nottingham Forest inkhel hi East Midlands derby a ni a, kum 1999 hnua top flight football-a an inkhelh lehna hmasa ber a ni.
Nottingham hian nipui bazarah player 23 zet an lalut a, club neitu Evangelos Marinakis pawhin beiseina sang tak a nei ang. Mahse, Foxes an hmachhawn hma hian Forest hian match sarih aṭangin point li chiah an hmu. Manager Steve Cooper-a'n pressure a nei tih thup rual a ni lo.
Marinakis hi Olympiakos neitu a ni bawk a, tun thlatir khan match 11 khelh zawhah manager Carlos Corberan chu a ban tawh a, Forest manager Cooper pawh hian a hna chelh zel turin chak a mamawh.
Leicester boruak a ṭha bik lo. Club chairman Aiyawatt Srivaddhanaprabha chuan tun season-ah player lei nan sum a theh chhuak tam lo a, team inthuam ṭhat nana player an lakluh pawh an player hralh chhuah hmun ruak hnawh khahna chauh a ni.
Defender Wesley Fofana chu Chelsea-ah pound maktaduai 70-in an hralh a, Wout Faes chu Reims aṭangin pound maktaduai 15 vel lekin an lalut. Goalkeeper leh team hruaitu pawimawh Kasper Schmeichel pawh hralh chhuah zingah a tel.
Maddison-a show
King Power Stadium-ah James Maddison-a'n a thiam thil a rawn pholang a, ṭan tirh lamah Forest defender a bum hrep hnuah a cross ball ṭha bik chu Kiernan Dewsbury-Hall-a'n goal zawnah a tauh thei lo. Minute 25-naah Maddison-a'n Forest midfielder Jesse Lingard clear fuh tawk loh chu box pawn chiahah changin, goal pawimawh khung nan a hmang.
Minute hnih hnuah Jamie Vardy ball pek chu Harvey Barnes-a'n box pawn aṭangin goal kilah a pet. Foxes an phur zel a, minute 35-naah Maddison-a'n freekick aṭangin mawi zetin a khung. Second half-ah pawh Maddison-a'n hmun pawimawh a chang tho a, minute 73-naah English midfielder cross chu Patson Daka-a'n mawi zetin a khenglut. Foxes-in 4-0 in hnehna an chang.
Hmarthlir England
Foxes-in an elpui Forest an hneh avangin point li an hmu a, team pahnih hi point hmuh zat inang chiah mah se goal difference nei ṭha zawk Brendan Rodgers hote hian table mawngphah an chhuahsan.
Premier League tla tur sawi nan a la hma a, league khelh laiin World Cup a awm dawn avangin Maddison chanchin sawi ruala an sawi tel chu Qatar-ah a tan hmun a awm ang em, tih hi a ni.
2021-22 season aṭang khan James Maddison hi goal 27 (goal 17 leh assist 10) ah a inrawlh a, English player zinga amah aia goal-a inrawlh tam chu Harry Kane (34 goals) chiah a awm.
Inkhelh banah Maddison chuan, "Qatar zin chu ka duh alawm, ka thil tum pawh a ni. Hun ṭha min pe a nih phawt chuan lawm takin ka pawm ang a, danglamna ka thlen thei bawk ang," tiin a sawi.
Tun dinhmunah hian Gareth Southgate-a'n Maddison aiin Phil Foden, Jack Grealish leh Mason Mount te a dah pawimawh zawk a, England tana khelh tum boruak a sang dawn.
Foxes manager Brendan Rodgers chuan, "Ani anga player ṭha tan chuan hmun a awm theih ka beisei. Foden hian talent a nei ṭha a, Mount pawh hi ka player duh zawng a ni a, Grealish hi player danglam tak a ni bawk. Mahse, Maddison hi chuan danglamna a thlen thei a ni," tiin a sawi.