Nkunku leh Chelsea ten inremna an nei

RB Leipzig forward Christopher Nkunku chuan 2023-24 season atan Chelsea nen inremna an nei. Infiamna chanchin ziaktu rintlak The Athletic-in a tarlan danin Chelsea hian Nkunku release clause euro maktaduai 60 (£52.7m, $58.8m) aia tam pek an inhuam niin an ziak.

London club hian release clause aia tam pek an inhuam chhan hi nakkum nipui bazarah a release clause hi a nung chauh dawn a, France international hi club dangin an chuhpui loa an chan nghal theih nan sum pek tam hret hi an inhuam.

Nkunku hian Chelsea zawm turin medical pawh a nei fel vek tawh a, hemi a nih avang hian London club hian an chang ngei turah a ngaih theih. Kumin June thla khan Nkunku hian RB Leipzig-ah kum 2026 thleng daih contract a ziah belh a, contract hmang zo loin Chelsea a pan zawk ang.

Season liam ta khan Nkunku hian RB Leipzig tan match 52 khelin goal 35 a khung a, assist vawi 20 a nei bawk. Tun season-ah Nkunku hian Bundesliga match riat aṭangin goal ruk a khung tawh a, inelna hrang hrangah match 12 aṭangin goal riat a khung tawh bawk.