World Cup-ah Bumrah a tel dawn lo

India fast bowler Jasprit Bumrah chuan 2022 Men's T20 World Cup chu hnungzâng na (back stress fracture) vangin a khel dawn lo. Kum 28 mi Bumrah hi khawvela player ṭha ber zinga mi a ni a, inhliam vangin South Africa nen T20 series nizana an khelh zawh takah pawh a inhnukdawk.

Bumrah chuan, "T20 World Cup-a ka inlan lo tur hi pawi ka ti hle. Duhsak taka min ṭawng thlamuantute chungah lawmthu ka sawi a, min ngaihtuahnaah ka lawm takzet," tiin a sawi.

India cricket fan-te chuan sum tamna Indian Premier League-a hmun pawimawh chang thei reng Bumrah hi World Cup a khelh theih dawn loh avangin an dem nasa hle.

India hi champion rinkai zinga mi ni mah se Bumrah bakah hian all-rounder Ravindra Jadeja chu khup hliam vangin an chân tawh a, nomawi chawi a harsa sawt dawn.

India rama cricket thuneitu sang ber Board of Control for Cricket in India (BCCI) chuan Bumrah thlakna tur hi an puang thuai dawn a, he thuziah lai hi chuan an la puang lo. Reserve list-ah Mohammed Shami leh Deepak Chahar te an awm a, Bumrah thlak thei tur zinga mi an ni.

India hian match hmasa berah Pakistan chu Melbourne Cricket Ground-ah October 23 hian an hmachhawn dawn a, ngaihven a hlawh ang.