Match bichilh lutuk vangin Swiatek lawm lo

Hmeichhe tennis world number 1 Iga Swiatek chuan inelna hmachhawn tur a tam thu a sawi a, tournament ṭhenkhat chu a inhnaihchilh lutuk avangin khelh vek theih a ni dawn lo, ruahmanna an siam danah Swiatek hi a lawm lo.

Kum 21 mi Swiatek hian an ram tan Billie Jean King Cup Finals khelh ngei a duh, inelna hi Glasgow-ah November 8 aṭanga khelh tur a ni. November thla tir hian Texas khawpuiah WTA Finals khelh tur a ni bawk.

WTA Finals khelh zawh ni aṭanga ni khat lekah Billie Jean King Cup Finals hi khelh a ngai dawn. America ram aṭanga Europe a let leh nghal pawh ni se, ni khat pawh chawlh nei loin tournament hmachhawn leh nghal a ngai tihna a ni.

Poland nula Swiatek chuan, "Ka team lam nen pawh uluk takin kan sawi ho tawh a, hreh hle mai ila Billie Jean King Cup ka khel thei dawn lo. Poland tan hian ka theihtawp ka chhuah ṭhin a, kuminah ram tana ka khel thei lo tur hi pawi ka

ti takzet.

"A nihna takah chuan WTA Finals khelh hun tur hi hriat sa a ni a, tum ni se la chuan tournament khelh tur hi tih danglam theih a nih ka ring. Hetianga in hnaihchilh lutukah chuan player tan inlan ve ve ngaihna a awm lo," tiin a sawi.

Swiatek hian tun season chhungin French Open leh US Open nomawi a chawi a, major title pathum la tawhin tunlai hmeichhe player zingah chuan amah elphak an awm meuh lo.