A zawna match ruk chak thei Udinese

Serie A season kal laiah Udinese chu team hmuhnawm zinga mi an ni phak. Thawhṭanni zan khan Udinese hian Verona 2-1 in an hneh, an league match khelh hnuhnung parukah an chak vek.

Verona muala inkhelah Josh Doig chuan minute 23-naah goal hmahruai a khung, hun rei tak chhung chu an goal hi an venghim thei. Mahse, tun hnaia khel ṭha tak Udinese hi dan reng theih erawh an ni lo.

Beto-a'n minute 70-naah si phurh a sut a, hun tawp hma chiahin Jaka Bijol chuan chakna goal a khung belh bawk. August 13 khan AC Milan an ngam lo a, a hnu lamah chuan chak loh an nei leh ta lo a ni.

Andrea Sottil enkawl team hi an chak tluang a ni satliah lo, an kalkawngah hian Jose Mourinho enkawl AS Roma leh Inter Milan te pawh an hneh a, tuna an kaltluang hi tih fuh satliah vang a ni lo tih a chiang.