Manchester United leh Chelsea-te’n UEFA Champions League khel dawn

Tun season Premier League tawp zanah Manchester United leh Chelsea ten Leicester City leh Wolverhampton Wanderers te an hneh a, season tharah champion Liverpool leh pahnihna Manchester City te nen Champions League an khel dawn.

Ole Gunnar Solskjaer-a'n inkhelh ṭan hmain 'inkhel thunun chungin hnehna kan chang ang' tihin a sawi a, King Power Stadium-a thil thleng erawh a dang daih. United-in inkhel thunun tuma inrintawkna nena ball an inpek kual hun chhung chu minute 10 vel lek a ni a, hlauhthawnna nen khel chhunzawm mah se minute 71-naa Bruno Fernandes-a penalty leh injury time-a Jesse Lingard-a goal hmangin hnehna an chang.

Champions League hmunruak pahnih club pathumin an inchuh a, King Power Stadium leh Stamford Bridge-ah inkhel pawimawh a awm. An mualah Chelsea an khelh avangin Frank Lampard-a hote tan hna harsa tur awmin a lang lo a, mipui mit fukna erawh Foxes leh United inkhel a ni.

United-in ball in pass kual mah se Leicester tlarhnung an thleng pha lo a, goal hmaah Foxes an hlauhawm zawk. Kelechi Iheanacho-a'n hun ṭha a neih hmang ṭha lo mah se David de Gea-a'n a man per avangin Jamie Vardy-a'n goal a khung teuh hle.

Halftime hma deuhin United-in Paul Pogba ball fing tak chu Marcus Rashford-a'n khung turin insiamrem ṭha mah se a finishing a ṭha tawk lo a, English striker goal khung tur chu Kasper Schmeichel-a'n a dansak bawk.

Second half-ah United an insiam ṭha thei lo a, chak mamawh Leicester City an hlauhawm tulh tulh. Foxes stiker Jamie Vardy-a'n crossbar a tauh per a, United chak lo thei dinhmunah an ding. 

Minute 71-naah United an vannei ta a, Anthony Martial-a'n Foxes defender Jonny Evans lakah penalty a hlawh chhuak. Bruno Fernandes rawn pen chhuakin Portuguese midfielder hian a tih ṭhin dan ngaiin ball pet hmaa zuang keuhin Kasper Schmeichel a bum a, United-in hma an hruai.

Foxes tan UCL khel turin goal hnih khung a ngai a, Solskjaer-a'n goal neihsa venhim tumin player taima Jesse Lingard leh Scott McTominay a luhtir. Leicester hna a harsa tawh a, minute 90-naa Jonny Evans hnawhchhuah a nih avangin beisei a bo.

Injury time minute 8-naah keeper Schmeichel-a ball pet chhuak tur chu player taima Lingard-a'n nang hmanin chak nemnghehna goal a khung. United 2-0 in an chak a, pathumna niin season an khar.

Chelsea

Frank Lampard-a'n khawvela keeper manto ber Kepa Arrizabalaga bench-ah a dah a, kum 38 mi Willy Caballero a ring zawk! Nipui transfer-ah Blues-in keeper thar an melh ngei a rinawm. Inhliam vangin Willian a khel thei lo a, Liverpool laka che ṭha Christian Pulisic-a'n rin lawk ang ngeiin bul a ṭan.

Wolves

Nuno Espirito Santo-a'n Crystal Palace hnehtute aṭangin player pathum a thlak. Bench-ah Portuguese midfielder Joao Moutinho dah a ni a, Raul Jimenez thlawp turin Diogo Jota leh Pedro Neto te dah luh an ni.

Manchester United

Luke Shaw a dam 

hman lo a, Brandon Williams-a'n bul a 

ṭan nawn. Ole Gunnar Solskjaer-a'n risk la loin formation chhuanvawr 4-2-3-1 a hmang nawn. United tan West Ham an hmachhawn ṭuma chauh hmel - Paul Pogba, Bruno Fernandes, Nemanja Matic ten bul an ṭan leh vek a, Norwegian manager-in ruahmanna danglam deuh a siam lo.

Leicester City

Brendan Rodgers-a nauten Tottenham Hotspur lakah goal thum an chhuah a, insiamṭhatna tur a awm tih a hria - player pathum a thlak. 3-4-3 aṭangin 4-5-2 ah an inthlak a, Ayoze Perez leh Harvey Barnes te bench-ah dahin Jamie Vardy thlawp turin Kelechi Iheanacho dahluh a ni. Midfield lamah inhnawh tam hretin Hamza Choudhury a rawn inlan a, ding lam aṭanga nawr turin Marc Albrighton dahluh a ni bawk.