Messi telna Argentina dinhmun a derthawng
Football inelna lian leh ngaihhlut ber FIFA World Cup-ah Lionel Messi te ram Argentina chu inlan ve phak lo dinhmunah an ding mek. World champion vawi hnih ni tawh Argentina hi nimin zing khan an mikhual Peru nen goal awm loin an inhnehtawk a, inkhel dangah Chile-in hnehna an chan avangin pangna aṭanga nek chhuah an ni.
Jorge Sampaoli naute hian an match hnuhnung ber atan October 11 zingah Ecuador an lenchilh dawn a, chet sual nawn chuan an hmabak chu World Cup khelh loh a ni. South America aṭangin ram 10-in World Cup qualifier an khel a, a sang pali chin chuan Russia pan theihna ticket an nei nghal dawn a, pangana chuan New Zealand nen inter confederation playoff an khelh a ngai dawn.
Peru laka an chak zawh loh avangin tun dinhmunah Argentina hi parukna an ni mek! An chunga awm Chile-in hmahruaitu Brazil an la tlawh dawn a, Peru leh Colombia an la inkhelh dawn bawk avangin Messi telna team hian Russia an pan ngei erawh a la rinawm zawk.
A goal lo
Sampaoli-a'n inkhelh ṭan hmain Messi leh Paulo Dybala te khelh duntir chu duhthusam ni mah se an tlanna hmun tur a inan avangin an luh rual loh tur thu a sawi. Juventus tan season kal laia goal 12 khung tawhtu aiah Boca Juniors striker Dario Bendetto luhtir a ni a, ram tana a match hnihna kheltu Bendetto hnungah Messi chu a duh anga khawsa tura dah a ni.
La Bombonera, Buenos Aires-a inkhelah Barcelona thiampuipa hian corner aṭanga ball lo kal chu rang zetin hlap mah se an dan per sak hman a, a thiam dan takin ball chak taka a tlan pui hnuah box pawn aṭangin kawh zeta a pet chu goal hrulah chiah a kal. Kum 30 mi Messi hian Benedetto tan ball ṭha tak siamsak mah se goal-ah a chantir thei lo a, ball rawn kal let chu Messi hian goal ban a pet per bawk.
Sevilla manager hlui Sampaoli-a'n Gonzalo Higuain a ko lo a, match hmasa lama a chhawr Mauro Icardi tan hmun a awm tawh rih lo bawk. Manchester City striker Sergio Aguero erawh hliam vanga khel thei lo a ni thung. Khawvel hmatawng langsar tak tak nei chungin Argentina hian match 17 an khelh aṭangin goal 16 chiah an khung thei a, World Cup an khel phak lo a nih ngat chuan dem tur chu tudang ni loin player an ni ang.
Beiseina
Argentina coach Jorge Sampaoli chuan hun harsa tak tawng mek mah se nakkuma World Cup khel turin an tlin ngei a beisei thu a sawi. Sampaoli chuan, "World Cup khel tur hian kan tlin ngei ka la ring, kan khel chhe lo a, goal kan khung lo kha kan vanduai a ni. Kan inkhelh lehpek turah hian kan duhthusam ang a thlen ngei ka beisei," tiin a sawi.
Ram tan match 120 a khelh aṭanga goal 58 khung tawhtu Messi-a'n tun qualifier bikah hian match kua aṭangin goal li chiah a la khung a, a ram tan hian sulhnu ropui hnutchhiah a duh a nih chuan Ecuador an hmachhawn hunah harsatna kara Barcelona tana Messi kha Argentina tan chhandamtu Messi a nih a ngai ang.
Sampaoli chuan, "Messi khan ṭha takin a khel a ni. A ṭhiante ball a pe kual hnem a, kan khingpui tlarhnung a chhaih buaiin hun ṭha pawh a sual chhuak bawk, ṭha taka kan khelh miau chuan kan mamawh goal chu kan khung ka ring tlat a ni," tiin an thiampuipa Messi leh a ṭhiante chungah rinna a la nghat lian hle.
Chile tan Sanchez
Nimin zing South America World Cup qualifier inkhel dangah Copa America champion lai Chile chuan an mikhual Ecuador chu 2-1 in an hneh a, Juan Antonio Pizzi-a kaihhruai Chile tan hian Arsenal forward Alexis Sanchez leh Eduardo Vargas ten goal an khung a, point 26 hmuin table-ah pathumnaah an inhlangkai.
Chile coach Juan Antonio Pizzi chuan, "A tawp kan la thleng lo, hnathawh hmabak kan la nei a ni. Kan hna hmasa tur chu Brazil laka ṭha taka khelh a ni ang, an ram inkhel tur ni mah ila inel tawk tak kan nih zia kan lantir ang," tiin a sawi.
Uruguay-in an mikhualna ramah Venezuela nen goal awm loin an inhnehtawk a, hmun himah an la awm thei bik lo. Hun tawp dawna Paris Saint-Germain striker Edinson Cavani-a'n a hun ṭha neih a chhawr ṭangkai thei lo a, hei vang hian Uruguay-in point 28 hmuin pahnihna ni mah se Bolivia laka point an hmuh loh chuan playoff khel thei an la ni.