Dinthar FC coach thar Vanlalrova

Mizoram Premier League champion hmasa ber Dinthar FC chuan table mawngphah aṭanga hruai chhuak turin Van­lalrova an lalut. Venghlui pa Rova hi Mizo trio tiha sawi ṭhin zinga mi kha a ni a, MPL-ah pawh Luangmual FC leh Zo United te a enkawl tawh a ni.

Maimawms hian MPL6-ah match sarih an khelh tawh aṭangin point nga an hmu a, table mawngphah awm mah se an chunga awm Ramhlun North nen point nga ve ve an hmu a, palina dinhmun hauhtu Aizawl FC pawhin point kua chiah an la hmuh avangin Dinthar FC tan knockout stage la beisei theih a ni.

Rova hian Dinthar pa Vanlalhlupuia Sailo a thlak. Maimawms-in Lalhlua kaihhruaina hnuaiah match ruk an khel hman a, point nga hmu hmanin pasarihna an ni. Dinthar FC hian an match hnuhnung berah coach nei loin Chhinga Veng an hneh lo. Season liam ta khan Lalhlua hian Dinthar FC hi tla thei dinhmuna an din laiin a enkawl ṭan a, semifinal thlen pui pha lo mah se hmun himah a dah.

Chona thar hma­chhawn tur Rova chuan, "Kan dinhmun hi a duhawm lo khawp mai a, amah­erawh­chu theihtawp kan chhuah ang a, hmasawnna kan hmuh ngei ka beisei. Tunah chuan relegation zone-ah kan awm a, a hmasa berah chuan he dinhmun aṭanga talchhuah hi kan tum ang. Kan match hmabak apiangah chak kan tum ang a, a bak chu engmah sawi theih ka la nei lo," tiin fimkhur takin a sawi.

Zo United coach hlui Rova hi TATA Football Aca­demy (2000-04) aṭangin a inzir chhuak a, Churchill Brothers-ah professional career bul ṭanin kum thum a khelh hnuah Goan club aṭangin Kolkata lam panin East Bengal leh Mohammedan SC tan kum khat ve ve khel lehin Churchill Bro­thers-ah (2009-11) a hun tawp a hmang. Rova hian a inkhelh hun chhung­in India aiawhin kum bithliah inelnaah (Under 16 leh Under 23) a feh­chhuak nual tawh bawk.

MPL ṭan hma season-ah Rova hian Luangmual FC a enkawl ṭan a, point khat lek la hmu hi MFA League-ah pahnihna a nih pui phak a, goal difference chiahin Dinthar FC a tluk pha lo. Maimawms coach thar hian AIFF D License certificate a nei a, National Under 18 Tournament-ah Mizoram final a thlen pui tawh bawk avangin coaching-ah tawnhriat a nei ṭha hle.

Dinthar FC coach thar Rova chuan, "Team siam ṭha turin player thar kan mamawh a, kan hruaituten inbiakna an kalpui mek a ni. Kan duh ang player hi kan lalut thei ta lo a nih pawhin kan player neih sa hi an ṭha a ni," tiin a team enkawl tur an chhawp sakah a lungawi thu a sawi.

Maimawms hian Oc­tober 13, Zirtawpni hian Ṭhuamluaia mualah Chanmari West an hma­chhawn dawn a, hei hi Rova hnuaia an match hmasa ber tur a ni. Dinthar FC hian Aizawl West Derby-ah hnehna an chang a nih chuan West Warrior nen point riat ve ve an hmu thei ang.