Chanmari FC-in Alex an chhuah

Mizoram Premier League champion lai Chanmari FC chuan Alex Whittemore an chhuah a, Liberian striker hian Mizo club tana a khelh chhungin goal a khung lo.

Chanmari FC hian MPL6-ah goal 9 chiah an la khung a, hmahruaitu Chhinga Veng goal khung zat chanve chauh a ni. Hei chauh hi ni loin Chanmarians hian goal khung tam lamah Aizawl FC (13 goals), Mizoram Police (12) leh Ramhlun North (11) an tluk pha lo a, Bethlehem Vengthlang FC nen an goal khung zat a inang bawk.

H. Vanlalthlanga hnuaiah Chan­mari FC-in MPL2 an champion khan league round-ah goal 30 an khung a, final-a an hmachhawn Luangmual FC chiahin an record hi an tluk phak. Chanmari FC hian goal khung kawnga an harsatna neih hi siam ṭhat an tum a, Liberian striker Alex an chhuahtir chhan ber pawh hi goal a khung theih loh vangah a ngaih theih.

Chanmari FC-in an match hnuhnung bera Chanmari West an draw ṭumin Alex hi an chhawr lo a, October thlaa transfer hun inhawng chhungin Chanmarians hian goal khung hna thawk tur striker an zawng ang.

MPL champion lai hian MPL6-ah pahnihna dinhmun hauh mah se pathumna Bethlehem Vengthlang FC nen an point hmuh zat a inang. October 12 hian Lungleia MPL match hmasa berah Chanmari hian hmahruai mektu Chhinga Veng an hmachhawn dawn a, Leitlangpuia veteran coach H. Vanlalthlanga leh Lalsangzuala Hmar hote intawng tur hi a hmuhnawm khawp ang.