England 1-0 Slovenia Three Lions tan World Cup a chiang
England-in Slovenia laka hnehna chang turin injury time an nghah thlen a ngai - Harry Kane chuan captain armband hreng chungin chakna goal a khung a, kum 2018 World Cup-ah England an inlan dawn.
Three Lions-in World Cup an khelh dawn avangin hlim mah se an hmaah hnathawh tur tam tak a inchhawp - an khel a hmuhnawm lo a, Wembley Stadium-ah Slovenia an chhaih mangang meuh lo. England boss Gareth Southgate-a hmaah hnathawh tur tam tak a inchhawp tihna a ni.
Group F inkhel dangah Scotland chuan hun tawp dawna Martin Skrtel own goal hmangin player 10-a khel Slovakia chu 1-0 in an hneh ve bawk a, World Cup an beiseina an chhi nung ve zel.
Fak hlawh lo val rual
England-in kum 2018 World Cup an khel dawn a, World Cup meuh khel tur tan hlim taka lawm tur a nih laiin Wembley Stadium-ah mipui thawm a reh hle - Russia pan dawn mah se an player-te khelh danah England fans an lawm lo a, tun ang renga hma an sawn loh chuan World Cup-ah eng ruai an ang leh dawn chuang lo tih an hria.
Minute 94-naa Kane-a'n chakna goal a khung hma hian England tan Marcus Rashford leh Raheem Sterling ten goal khungna remchang nei mah se an chhawr lo a, England tlarhma-ten inrem fuh Slovenia tlarhnung an paltlang zo meuh lo - tun hnaia sawisel hlawh tak goalkeeper Joe Hart-a'n vawi tam a chhanhim bawk.
Tlarhmaa Kane leh Rashford-te an awm chuan 'team hmuhnawm' ni tura beisei an ni a, mah se chu beiseina chu England-in an ti hlawhtling lo - a bik takin central midfieldaṭangin 'ball ṭha' hmuh tur a vang a, England hian hma an sawn lo a nih chuan Europe-a ram lian zingah chhiar tel an harsa zel ang.
Beisei phak lo Ox
Southgate-a'n hrem vangin Dele Alli a chhawr thei lo a, rin loh takin Liverpool a pan hnua beisei phak lo Alex Oxlade-Chamberlain chu inkhel bul a ṭantir - Southgate-a'n Ox a ringtawk tih a chiang. Mahse, pound maktaduai 35 man midfielder hian a pu rinna a chhanglet thei lo - minute 54-naah lakchhuah a ni a, Jesse Lingard chuan a thlak.
England boss Southgate hian Malta leh Slovakia an khelh ṭum pawh khan Ox hi a ringtawk tih pholangin inkhel bul a ṭantir a, mah se English midfielder hian tun thleng chuan rawlthar a nih laia amaha beiseina sang tak kha a la pho chhuak thei lo - a khelh danah inrintawkna a tlachham tih a lang a, a chunga beiseina ang thleng tur chuan Liverpool-ah bul a ṭan a ṭul ang.
Harry Kane erawhin ṭum dang ang bawkin innghahna tlak a nihzia a pholang nawn a, England captain dinhmun luah lailawktu hian nakkum World Cup-ah captain armband a hreng a nih pawhin a mak lo ang - goal hmaah a hriam a, a rilru a huaisen a, theihna sang tak a nei bawk. Tun dinhmuna English player zingah amah ang an tam lo
Hmasawn ngai England
England manager Gareth Southgate chuan, "He team hian theihna sang tak kan nei a, mah se kan hmaah hnathawh tur tam tak a la awm. Kha aia ṭha zawk khan kan khel thei tih ka chiang a, mah se kan tum ram chu kan thleng tho e. He hna pek ka nih khan tih tur hmasa ber tuk sak ka nih chu World Cup khelh a ni," tiin a hna a hlen thu a sawi.
Southgate chuan team naupang tak an nih thu sawi nghalin, "Team naupang tak kan ni a, kan chhehvela pressure sang zawng zawng nen ka naute tan hian an hna hi a harsa ve bawk a ni. Ka naute hian an theihna zawng zawng an pe a, kan hriatreng tur chu ka player-te hian Champions League medal pawh an la nei lo. A tawpa pawimawh ber chu England-in World Cup kan khel tur hi a ni," a ti a, a team enkawl chu team naupang tak, tawnhriat la ngah lo an nih thu a sawi.
England-in a zawna World Cup an khelh vawi rukna tur a ni a, mah se 1966 World Cup an ram ngeia an chawi hnuah an champion tawh lo. Kum 2006 hnuah World Cup-ah vawi khat chiah an la chak bawk - Southgate chuan, "Kum engemaw zat kan lo hlawhchham tawhna kha ka naute hian an tuar mek a, pressure a sang a ni. Mahse, England tan kan khel a nih chuan hei hi tawn tur chiang sa a ni," tiin pressure a san thu a sawi - England hian Pathianni zanah Lithuania an lenchilh leh ang.