Barca-a a hun tawp hmang tur Iniesta
Andres Iniesta chuan Barcelona-ah a career hmang zo turin contract thar a ziak - kum 33 mi midfielder hian a inkhelh peih chhung chu Barcelona tan a khel dawn tihna a ni.
Spain international hian Catalan club tan hian match 639 khelin goal 55 a khung sak a, club tana inlan tam lamah pahnihna a ni. Barcelona youth academy hmingthang La Masia
aṭanga in zir chhuak Iniesta hian kum 12 lek a nih laiin Barca hi a zawm tawh a, club captain dinhmun a chelh mek.
October 2002 khan Barcelona tan a match hmasa ber a khel a, a hawikir tawh lo. Spanish La Liga-ah vawi riat lai champion nomawi a chawipui a, Champions League-ah vawi li ngawt a champion pui bawk.
Kum 2015 khan Barcelona captain-ah hlan kai a ni a, Barca tan inelna hrang hrangah nomawi 30 a chawi tawh - Catalan club tana nomawi chawi hnem ber dinhmun chu Argentine forward Lionel Messi nen an chelh mek.
Spain lamah pawh Iniesta a hlawhtling a, European Championship-ah vawi hnih nomawi a chawipui a, 2010 World Cup final-a Netherlands an hmachhawn ṭumin extra time-ah chakna goal a khung bawk.
Barcelona chuan, "Andres Iniesta chuan Barcelona-ah a damchhung hun atan contract a ziak a, a career chu he club-ah hian a hmang zo dawn a ni," tiin thuchhuah a siam.