China Open-ah Nadal-a'n semifinal a lut

World number 1 Rafael Nadal chuan John Isner hnehin China Open semifinal a lut a, vawiinah Grigor Dimitrov nen final luh inchuhin an inkhel zui leh nghal ang. Nadal hian kum 2008, 2010 leh 2013 khan world number 1 ni chungin season a khar tawh a, kuminah a vawi li nan beiseina a nei sang chho hle.

Nimina inkhelah Nadal hian American star Isner lakah hian 6-4, 7-6 (7-0) in hnehna a chang a, China-a ATP World Tour 500 tournament khelhah hian vawi 23 hnehna channa chiah niin ṭum nga chak loh a nei tawh thung, semifinal-a a hmachhawn tur Dimitrov hi tun hmain vawi riat a hneh tawh.

Service nei ṭha tak Isner hian vawi 22 ngawt aces a siam thei a, mahse vawi khat mah Nadal service a chhuhsak thei lo. Grand Slam vawi 16 champion tawh Nadal-a'n a service a hum tlat a, set pahnihah hian hun pawimawhah tak zel a khingpui service a chhuhsak thei a ni.

Quarterfinal inkhel dangah Dimitrov chuan darkar hnih leh minute 29 chhungin seeded pa­ngana Roberto Bautista Agut chu 7-6(5), 4-6, 6-2 in a hneh ve bawk. Dimitrov hi tun dinhmunah world number 8 a ni mek a, semifinal a luh chiah hian ATP ranking-ah point 90 hmuh belhin season tawpa a thiam pariat ten an khelh ṭhin ATP Finals khel ngei turin a dinhmun a sawhnghet chho zel.