Van der Sar-a'n Ronaldo thuruk a puan

Manchester United goalkeeper hlui Edwin Van der Sar chuan English club tan a khelhpui ṭhin Cristiano Ronaldo ṭhatna thuruk a sawi a, Portugal captain hi Everton striker Wayne Rooney aia a ṭhat chhan a sawi bawk.

Dutch keeper Edwin van der Sar chuan, "Cris­tiano leh Wayne ten rim takin training-naah an thawk ve ve a, Ronaldo erawh a thlir thui hret a ni," tiin Portugal captain a fak.

Attacking player te hian training zawhah ball pet te an zir ṭha leh ṭhin a, striker tam zawk chuan goalkeeper naupang deuh an awm tlai pui mai ṭhin. Ronaldo erawhin United a awm laia keeper ṭha ber Van der Sar awm tlai pui turin a ngen ṭhin thung.

Van der Sar chuan sawi zelin, "Ronaldo chuan khelmual pawnah a taksa a uluk a, awm hahdam hun a hria a, a taksa tih chak nan a thawkrim bawk," tiin Portuguese forward chuan English forward Rooney aia a taksa a uluk thu a sawi.