Germany an tling chiang ta

World champion Germany chu nakkuma khelh tur FIFA World Cup-a inlan turin an inpet tling leh ta. Ningani zan khan Die Mannschaft hian Northern Ireland chu 3-1 in an luhchhuah a, match kua an khelhah hnehna an chang vek - point 27 hmuin Group C hmahruaitu an ni.

Germany tan Sebastian Rudy, Sandro Wagner leh Joshua Kimmich ten goal khat ṭheuh an khung a, hun tawp dawna Josh Magennis tauh luh chuan Northern Ireland mualpho lutuk tur a hliahkhuh zo lo.

Captain Philipp Lahm-a'n in­khelh a chawlhsan hnua Germany leh Bayern Munich lama right back luahlumtu Kimmich hian Rudy goal khung tur a siamsak khan tun qualifier chhunga assist vawi riat a neihna a ni a, kum 22 mi Kimmich hi an ramin Russia an pan theihna tur kalkawngah goal venhim leh a khung kawngah tha a thawh hlawk hle.

Germany hian an rawlthar rual hmangin Confederation Cup nomawi an chawi thei a, nakkum World Cup khel tur pawh hian a rawlthar rual an chher hriam chho hle. Rawlthar rual bakah kum 29 mi Timo Werner-a'n harhtharna changin senior team tan match riat a khelhah goal ruk a khung thei.

Die Mannschaft manager Joachim Low chuan, "Draw neih a nih chiah khan kan group hi thunun kan duh nghal a, kan duh leh beisei ang ngeia thil a kaltluang thei hi ka lawm. Russia pan tura kan tlin tak avang hian kan player-te hian a lawmna nuam an chen ngawt dawn lo, pawng tawng sahawk hi chu mipuitling zia a nih loh bakah kan tihdan phung a ni lo," tiin a sawi.

Germany hian khualmualah a zawnin match 13 chhung hnehna an chang thei a, Northern Ireland hian Windsor Park-ah tun hnai kum li chhunga an vawi khat chak lohna an tawng thung. Michael O'Neill a enkawl Ireland hian Pathianni zanah Norway an hmachhawn leh dawn a, playoff khel phak chiang turin point an la mamawh.