FIFA U17 World Cup Brazil hmaah Spain - inkhel a hmuhnawm dawn
Zanin FIFA U17 World Cup-ah inkhel hmuhnawm hmuh tur a awm nghal dawn - tlai dar 5:00-ah Brazil leh Spain an inhmachhawn ang a, Germany leh Costa Rica an inkhel bawk ang.
Zan dar 8:00-ah inkhel pahnih a awm dawn bawk a, Group D inkhelah North Korea leh Niger inhmachhawnin dar 8:00 veka Iran leh Guinea inkhel chu hmuhnawm zawk tura ngaih a ni. Inkhel te hi Sony ESPN, Sony ESPN HD, Sony Ten 2, Sony Ten 3-ah live-in a en theih dawn.
Brazil vs Spain
Football a nih tawh chuan eng level pawh ni se Brazil leh Spain inkhel hi ngaihnep theih a ni lo - FIFA U17 World Cup-ah pawh ram pahnih hi champion tura rin kai zingah an tel pha a, Group D-ah an awmho miau avangin ram pahnihin group stage aṭangin fiahna hautak an hmachhawn nghal dawn tihna a ni.
Brazil-in FIFA World Cup-a sulhnu an neih ṭhat tluk zetin Under 17-ah pawh sulhnu an nei ropui a, 1997, 1999 leh 2003-ah champion-in 1995 leh 2005-ah final an lut bawk. Spain-in U17-ah sulhnu ropui chhuan tur an nei lo a, 1991, 2003 leh 2007-ah final lut mah se champion nomawi an chawi thei lo.
Vinicius tel loin
FIFA U17 World Cup khelh a hnaih ruala hming ri ring ber chu Vinicius Junior a ni. Mahse, Real Madrid-in euro maktaduai 46-a lakluh tura an dawr fel tawh striker hi squad-ah telh a nih vek hnuah a club khelhna Flamengo-in Brazil Serie A lama an chet chhiat avangin chhuah an phal lo a, Vinicius tel loin Brazil an khelh a ngai dawn.
Brazil te ang tan Vinicius awm loh hi lungngaihna lutuk tur a ni chuang lo. Real Madrid forward ni mai tur tel lo pawh hian tlarhmaah Vasco da Gama forward Paulinho, Flamengo striker Lincoln, Sa Paulo rawlthar duhawm Brenner an nei a, anni ho chawm tura Palmeiras midfielder Alan Souza awm hi coach tan chuan hahdamna tham a ni.
A hming chu Abel
Spain squad-a hming langsar ber chu Abel Ruiz a ni. Barcelona rawlthar duhawm hian kum 17 mi lek nichungin record a siam nual tawh. UEFA European Under-17 Championship 2017-ah khan goal riat a khung a, he inelnaa tournament khata goal khung hnem ber record chu Amine Gouiri leh Odsonne Edouard te nen an inṭawm.
Euro U17-ah qualification chhiar telin goal 16 ngawt a khung a, hei pawh hi Jose Gomes nen record an inṭawm. Spain U17 tana goal khung hnem ber niin goal 19 a khung bawk - Brazil tlarhnung tan ven uluk a ṭul ang.
Spain hian tlarhnunga ding turin Manchester City defender Eric García leh Barcelona left back Juan Miranda an nei bawk a, midfield-a khel turin Real Madrid rawlthar duhawm Antonio Blanco leh Mohamed Moukhliss-te an neih bawk avangin tlarhmaa Abel Ruiz hoa Real rawlthar Pedro Ruiz-te intlar turin chawmtu an nei ṭha dawn.
Costa hmaah Germany
Germany-in last 16 an inpetkai ngei a rinawm a, Group C-ah Guinea, Costa Rica leh Iran-te nen an awmho. Fiahna hmasa ber chu Costa Rica lakah an hmachhawn dawn. Mizo zingah Germany an mikhual lo a, an students national team ringawt pawh Lammualah an thiam zia kan hmu tawh - an rawlthar ṭha rual thlankhawm hi an chhe thei lo.
Hamburger rawlthar Jann-Fiete Arp hi Germany tan innghahna tur a ni dawn. Under 17 tan match 14-a inlanah goal 13 a khung tawh a, Euro U17 khelh zawh takah khan ṭum hnih ngawt hattrick a siam. Hamburger tan youth league lamah a hun tam zawk a la hmang rih a, Club Under 17 tan match 44-a inlanah goal 36 a khung tling tawh - player langsar nei lo Costa Rica tan ven uluk a ṭul ang.