Number 1 ni thei Halep

Serena Williams a inkhelh theih loh hnuah hmeichhe singles ranking a ngelnghet lo hle. Simona Halep chu tun season chhunga number 1 ni thei dinhmunah a ding mek - Halep hi China Open khelh mekah final a lut a nih chuan Angelique Kerber, Karolina Pliskova leh Garbine Muguruza te hnungzuiin tun season chhunga hmeichhe world number 1 ni thei pangana a ni ang.

Romanian nula Halep hian nimin khan Russian star Daria Kasatkina chu 6-2, 6-1 a sawpin China Open semifinal a lut. Halep hian last 16-ah tun hma lama a hneh theih ngai loh Maria Sharapova a hneh tawh bawk.

World number 3 Elina Svitolina-i chuan nizan khan quarterfinal a khel ve a, he thu buatsaih lai hian result kan hre hman lo. Svitolina hian nomawi a chawi thei a nih chuan number 1 dinhmun a luah thung ang. China Open-ah hian world number 1 Garbine Muguruza chu a match hmasa berah dam lohna vangin a khel tluan thei lo a ni.