Ajinkya Rahane vuipuitu Gavaskar

India cricket legend Sunil Ga­vaskar chuan Twenty 20 inter­national series-a Australia hmachhawn tur zinga Ajinkya Rahane telh a ni lo chu a sawisel. India hian T20 hma hian ODI series-ah Australia chu 4-1 in an sawp a, Rahane hi run siam hnem ber dawttu niin run 244 ngawt a siam - hetichung hian T20 squad-ah telh a ni lo.

Hei mai hi a ni lo, kum 29 mi batsman hian ODI match hmasa ber tih lohah hi chuan half century a vaw chhuak tling vek a, India T20 squad-a telh a ni lo hian sawi a hlawh hle. Gavaskar chuan, "Rahane hian match li chhung a zawnin 50 chuang a vaw chhuak a, squad-a telh a nih loh chhan hi ka hrethiam lo," a ti.

India captain hlui chuan Australia laka ODI series match khat pawh khel lo KL Rahul koh a ni chu sawisel nghalin, "KL Rahul hi player ṭha tak a ni. Mahse, Australia lakah khan match khat pawh a khel lo. Chutichung chuan T20-ah koh a ni a, Rahane en kan a ni leh bawk si," tiin India team selector-te chu a hriatthiam loh thu a sawi.

Zanin dar 7:00-ah India hian Australia nena an T20 series match hmasa ber chu an khel dawn a, match thum an khel dawn. Match hnuhnung ber hi October 13-ah khelh a ni ang.

India Squad: Virat Kohli (Capt), Rohit Sharma(VC), Shikhar Dhawan, KL Rahul, Manish Pandey, Kedar Jadhav, Dinesh Karthik, MS Dhoni(wk), Hardik Pandya, Kuldeep Yadav, Yuzvendra Chahal, Jasprit Bumrah, Bhuvneshwar Kumar, Ashish Nehra, Axar Patel.