FIFA U17 World Cup India an tlawm nghal; Zaninah hun ṭha

FIFA U17 World Cup-a an match hmasa berah India chuan USA 0-3 ngawtin an ngam lo a, zanin dar 8:00-ah an inkhel lehnghal dawn - India hmaa ding tur hi Colombia an ni a, an tlawm nawn leh a nih chuan India tan last 16 luh a harsa tawh ang.

Zirtawpni zana Delhi khaw­puia USA nena an in­khelhah India hian hun rei tak chhung American rawlthar rual chelh thei mah se, minute 30-naah penalty an chawi avangin India an tho tawh lo. USA lamin second half-ah goal hnih dang khung chhunzawmin hnehna an chang.

Penalty
Inkhelh ṭan tirh aṭang­in India an bet nghal a, team pahnih inthlauh dan ngaihtuahin awm lo a ni hran lo. Jawaharlal Nehru Stadium, New Delhi-a mipui 40,000 chuang hmaa inkhel Indian rawlthar rualte an zam tih hai rual a ni lo a, ball pass sual leh clear ṭhat loh a tam a, USA-in chance hlauh­awm an neih phah leh ṭhin.

USA an vanduai reng lo - minute 30-naah defender Jitendra Singh chuan Josh Sargent a titlu a, penalty a chawi. USA captain hian harsatna nei loin goal-ah a chantir a, India dinhmun a chhia tih hai rual a ni lo. Mahse, minute 15 dang India an ṭang tlang a, goal dang lut loin chawlhlawk hman a ni.

Team thar
Chawlhlawk hman a ni a, US bawk an hlauhawm chhunzawm. Minute 51-naah India-in an defending pher an tuar a, corner aṭanga kal ball an petchhuah ṭhat tawk loh chu Chris Durkin-a'n an goal hnihna khung nan a hmang. Chawlhlawk laiin India coach Luis Norton de Matos-a'n thu ṭha a sawi tih a hriat a, goal chhuah hmasa mah se India game a ṭha sawt.

An goal hnihna an chhuah hnu lawkah Komal Thatal chuan hun ṭha a nei ve nghal a, mah se goalkeeper chauh a hmachhawn hnuah crossbar chungah a pet. India-in tlawm tum loin huaisen takin an bei chhunzawm a, minute 82-naah Anwar Ali chuan woodwork a pet per - counter attacking hmangin US-in an nawr let thut a, India-in an tuar lo. Andrew Carleton chuan chak nemnghehna goal a khung a, US an chak. Hun tawp dawnah Mizo rawlthar Lalengmawia tlan luhtir ni mah se inkhel thlak danglam turin hun a nei lo.

MPL Under 17 inelnaa Luangmual, Dinthar leh Chanmari tana inlan tawh Apuia hi Mizo zinga FIFA World Cup inelnaa inlan hmasa ber a ni.

Team innghahna
India tan si ban nghaktu Dheeraj Singh chu fak tlak khawpin a che ṭha a, Manipur goalkeeper hi che ṭha lo se chu India hian si tam zawk an phur ang tih chu thil chiang a ni. Midfield-ah Amarjit Singh chu fak phu a ni. India captain hi a tlan tam a, tackle a ngah hle. Mual veilam sirah Komal Thatal chu US tlarhnung chhaih mangangtu a ni a, he Sikkimese rawlthar hian a ball thiam tluk zetin a finishing tawih se chu game thlak danglam thei tur khawpa player theihna nei sang a ni.

Nicolai Adam-a'n a hnawl hnua Matos hnuaia sengluh Anwar Ali-a'n a pu rinna a ti hlawhchham lo a, tlarhnung laiah India innghahna a ni - Colombia laka goal chhuah lo turin Dheeraj Singh nen an pawimawh fal ang. World Cup ṭan hma hauha ngaihven hlawh Aniket Jadhav-a'n inkhel ṭantir lamah chance nei bawk mah se beisei a phak lo tih hai rual a ni lo a, Colombia laka goal khung tur chuan Aniket chet ṭhat hi a pawimawh ang.

Matos thukhawchang
India coach Luis Matos chuan, "Kan inkhel min ṭawi­awmtute khan minti phur takzet a, theihtawp chhuah turin min pui a ni. A hmaa ka sawi tawh angin he inelnaa tel team-te leh keini chu kan la inthlau em em a, chutihrual chuan hmasawnna tam tak erawh ka hmu. First half-ah ṭul lo takin penalty kan chawi a, goal kan chhuah zui. Zep lohah chuan inkhel ṭantirah khan ka naute kha an zam a, ṭum danga kan pass dik ṭhinnaah pawh kan pass dik hleithei lo," a ti a, a naute chu mipui 40,000 hmaa an vawi khat inkhelhna a nih avanga an zam thu a pha lo.

Norton chuan sawi chhun­zawmin, "Komal leh Anwar hmangin hun ṭha kan nei a, mah se kan chhawr lo. Anwar Ali-a shot kha goal-ah lut ngat se chu USA kha pressure hnuaiah an awm ang a, kan game kha a danglam daih thei ang. Kan result-ah lawmna tur ka hmu lo a, mah se ka naute khan tawnhriat tam zawk nen chuan khawvela team ṭha ber pawl pawh an el theih tih an lantir a ni," a ti.

India hmabak Colombia
Zirtawpni zan Group A inkhel dangah Ghana U17 chuan 1-0 in Colombia U17 an ngam a, zaninah India leh Colombia hi an inhmachhawn ve leh dawn. Group A inkhel dangah Ghana U17 leh USA U17 chu tlai dar 5:00-ah an inkhel dawn bawk. Ghana hian Colombia lakah goal khat chiah khung mah se an chance neih ngaihtuahin goal tam zawk khung thei an ni a, team ṭha zawk an ni tih chiang taka hmuh turin a awm - India hian Colombia lakah point an hlawh chhuak zo lo a nih chuan point beisei chhunzawm a harsa ang.

World Cup hma Four nations tournament-ah Colombia hian 3-0 in India hi an sawp tawh a, mahni muala tlawm nawn lo turin Indian player te an ṭan mar a ngai dawn a ni. FIFA U17 World Cup hi Sony ESPN, Sony ESPN HD, Sony Ten 2 leh Sony Ten 3-ten live-in an pe chhuak a, live streaming-in Sony Liv website leh App-ah te en theih a ni bawk.