World Cup khel tur Nigeria

Nigeria chu Africa ram zinga World Cup 2017 khel tura inpet tling thei hmasa ber an ni. Inrinni zan khan Arsenal forward Alex Iwobi-a goal hmangin Nigeria hian Zambia 1-0 in an hneh a, match nga an khelh tawhah point 13 hmuin Group B hmahruaitu an ni - an elpui rang dang pathum tan umphak theih an ni tawh lo.

Zambia lakah Nigeria tan hian Odion Ighalo, John Mikel Obi, Victor Moses leh Moses Simon ten hun ṭha nei mah se an chhawr ṭangkai thei lo vek, Zambia goalkeeper Kennedy Mwenne chuan Wilfred Ndidi-a goal khung tur chu ṭha zetin a dan sak bawk. Goal lut loin an ṭin mai dawna a lan hnuah Shehu Abdullahi-a siamsak chu minute 73-naah Iwobi chuan a khung a ni.

Nigeria hian FIFA World Cup vawi ruk an khelhna tur a ni a, tun hnaiah a zawna vawi thum an khelhna tur chiah a ni bawk. Kum 1994, 1998, 2014, 2002 leh 2010 te khan ram leh ram football hmanga inelna lian berah hian an inlan tawh bawk. Heng vawi ruk an inlan tawhah hian ṭum thum chu last 16 an lut phak.

Group B inkhel dangah Cameroon chuan Clinton Njie leh Franck Tchidjui Pangop te goal hmangin Algeria 2-0 in an hneh a, African champion Cameroon hian point ruk an hmuhna chauh a la nih avangin Russia pan turin kawng a ping tawh. A zawna World Cup vawi hnih khelh hnuah Cameroon hi an inlan phak dawn ta lo tihna a ni.

Africa aṭang hian ram 20-in World Cup qualifier an khel a, group pangaah ṭhen niin team pali zel an awm. Ram palite hi vawi hnih ṭheuh an inkhel kual dawn a, a sang ber chiahin Russia pan theihna ticket an nei dawn - match khat khelh hmabak an la nei.

Super Eagles (Nigeria sawina) coach Gernot Rohr chuan, "Match ngaah vawi li hnehna kan chang a, ṭum khat kan khingpuite nen kan inhnehtawkpui thung. Ram ṭha tak takte nen kan awmkhawm a, team ṭha lakah result duhawm kan neih theih avangin he dinhmun luah hi kan phu a ni," tiin a sawi.

Inelna bul an ṭan dawn chauh tih sawi zuiin Rohr chuan, "Kan duh chin kan thleng tihna a la ni lo, tunah hian inelna tak tak thleng turin kan in pet tling chiah a ni. World Cup chu tun ai hian a la harsa zual dawn a, kan taksa bakah rilru thlengin nasa lehzuala inbuatsaihna kan neih zui a ngai dawn a ni," tiin a sawi.

Ghana goal an pawm lo

Group E lamah Ghana leh Uganda te goal awm loin an inhnehtawk, hun tawp dawna Ghana forward Raphael Dwamena goal khung chu offside tia pawm loh a ni a, Ghana Football Association (GFA) chuan an goal pawm a ni loh chu an hrethiam lo a, football thuneitu sang FIFA hnenah lungawi lohna thu an thlen.

Thuchhuah siamin GFA chuan, "Mandela National Stadium-a inkhel chungchangah khan kan goal pawm a ni lo kha kan hrethiam lo a, television replay en a nih hnuah offside lo tih a lang chiang bawk," tiin FIFA hnenah an lungawi loh thu an thlen.

Ghana hian match nga an khelh tawhah point ruk an hmu a, an mahni aia match khata khelh tlem zawk Egypt chuan point kua an hmuh tawh avangin Ghana tan beisei tur a tam tawh lo hle.