Netherlands tel lohna World Cup?

Total football hmu chhuaktu tiha an sawi ram Netherlands chuan Belarus 3-1 in hneh mah se Russia ram an pan theih a rinawm ta lo.

Oranje hian an match hnuhnung berah point thuma an phak loh Sweden an la hmachhawn dawn nachungin FIFA World Cup-ah goal diffe­rence en tur a nih avangin an hmabak an ko hle.

Inrinni zan Group A inkhelah Sweden-in Luxembourg chu 8-0 zetin an sawp. He mi result hre chung hian Netherlands-in Belarus 3-1 chauhin an hneh thei a, France-in Bulgaria 1-0 in an hneh ve bawk.

Hmahruaitu France

France-in minute thumna lekah Blaise Matuidi hmangin an khung a, goal dang lut belh tawh loin Bulgaria 1-0 an hneh. Les Bleus hi Group A hmahruaitu an ni a, anmahni hnaih bertu Sweden aiin point khatin an hmu tam zawk.

France hian Thawhlehni zanah Belarus an hneh chuan Russia an pan thei dawn a, an chak zo lo a nih pawhin Netherlands-in Sweden an hneh chuan World Cup an khel thei ang.

Netherlands dinhmun chu

Sweden-in goal khung a pawimawh tih hriain Luxembourg lakah thapui chhuahin goal riat zet an khung a, kum 1938 hnua an khung tam ber ṭum a ni. UAE club Al Ain FC tana khel Marcus Berg chuan goal li a khung a, Sweden khingpui Luxembourg hi France la tlin lohna chhan an ni a, goal awm loin Les Bleus hi an draw a ni.

Netherlands-in goal an mamawh tih hre mah se Borisov-ah mualneitu Belarus 3-1 chauhin an hneh a, playoff khel pha turin an match hnuhnung berah Sweden goal sarih tala an hneh a ṭul dawn. Sweden leh Luxembourg inkhelh hma hian Netherlands boss Dick Advocaat chuan 'Sweden hi 8-0 in chak ta se' tih zawhna chu, "Sawhna mawl tak a ni. Thil theih a ni lo," tiin a chhang a, amaherawhchu Sweden-in thil theih loh an tih theih takah chuan Netherlands World Cup khel turin an mualah thilmak an thlentir ve a ṭul ang.