Portugal chhantu Ronaldo

Nakkuma FIFA World Cup khelh turah khawvel player ṭha pahnih Cristiano Ronaldo leh Lionel Messi te chu inlan lo thei dinhmunah an ding. European champion Portugal erawhin Inrinni zan khan Ronaldo goal hmanga Andorra 2-0 in an hneh a, an match hnuhnung berah Group B hmahruaitu Switzerland an hneh chuan Russia an pan thei ang.

Portugal coach Fernando Santos chuan captain leh an ram tana goal khung tam ber Ronaldo chu bench-ah a dah a, goal an khung thei lo. Second half-ah Real Madrid forward Ronaldo chu khelmual chhungah a inlan a, minute 63-naah goal hmahruai a khung bakah minute 86-naah Andre Silva goal khung tur a siam sak bawk.

Inkhelh banah coach Santos insawifiahin Ronaldo-a'n inkhelh bul a ṭan loh chhan chu ni hnih hun an neihah 100% a training a neih theih loh vang a nih thu a sawi a. Hei bakah hian Real Madrid forward hian yellow card hmu se chuan Switzerland nen match pawimawh an khelh hunah a inlan thei dawn lo.

Ronaldo-a'n card a chawi lo a, Thawhlehni zana Switzerland nen an inkhelh hunah chuan bul a ṭan tawh ang. Kum 32 mi forward hian qualifier-ah goal 15 khung tawhin Europe ram zingah chuan Poland striker Robert Lewandowski nen top scorer an ni a, Belgium striker Romelu Lukaku-a'n goal 10 khungin a dawt ve bawk.