Ruahsur karah India chak
India-in ODI series-a Australia an sawp hnuin T20 series-a an match hmasa berah pawh hnehna an chang lehnghal a, ruahsur vanga DL method hmanna inkhelah Australia chu wicket kuain an hneh.
Ranchi khawpuia inkhelah Australia an bat hmasa zawk a, over 18.4-ah run 118 an siam tiha ruah a sur avangin inkhel tihtawp a ni a, wicket riat an hloh. Australia tan Aaron Finch chuan run 42 siamin run siam hnem ber a ni a, Aussies batsman dang zingah run 20 vaw kai an awm lo!
Ruah sur vangin DL method hman a ni a, India chu six over bat tura tih niin an target chu run 48 a ni. Run 11 chiah a siam tihin Rohit Sharma out nghal mah se Shikhar Dhawan (15) leh Virat Kohli (22) te a tawp thleng dama an bat avangin India-in hnehna an chang.
Australia tana a T20 match hmasa ber kheltu Jason Behrendorff-a'n over khat chiah a vawm hman a, debut hriat reng tlak a ni lo. Ram pahnih hian T20 series hi match thum an khel dawn a, naktuk zan dar 7:00-ah match hnihna an khel leh ang.