Pirlo a chawl dawn ta

Andrea Pirlo chuan New York City FC-a a contract a zawh hunah football a chawlhsan tur thu a sawi. AC Milan legend hian kumin December thla thleng bak chu MLS club New York City tan hian contract a nei tawh lo.

Italy international hlui Pirlo hi kum 38 mi a ni tawh a, a vanglaiin Milan leh Juventus tan Serie A nomawi vawi ruk a chawi a, Champions League nomawi vawi hnih a chawi bawk - an ramin 2006 World Cup title an lak theih nana player pawimawh leh ṭangkai a ni phak bawk.

A chawlh tur thu sawiin Pirlo chuan, "Nitin ṭha taka training turin ka taksain a tlin tawh lo, kum 50 nih thleng khelh duh mah ila a rem lo. Tunah kum 38 ka ni a, ka ngaihdan chuan ṭhangtharte tan hmun ka ken a hun tawh a ni," tiin a sawi. Pirlo hi an ram Italy tan ṭum 116 a inlan a, club hrang hrang tan match 755 khelin goal 61 a khung.