FIFA U17 World Cup Brazil-in Spain an ngam nghal

Inrinni tlai FIFA World Cup U17 inkhel ngaihven hlawhah Spain rawlthar rual aiin Brazil an thiam zawk a, 2-1 in hnehna an chang. Group D inkhel dangah rin hlawh lo Niger chuan North Korea 1-0 in an hneh bawk a, an hmaa ding hi Brazil leh Spain an la nih avangin hmabak erawh a la hautak hle.

World Cup U17 group match-a mipui hmuh châk ber pawl chu Spain leh Brazil a ni. Kochi khaw­puia inkhelah beisei ang ngeiin inkhel a hmuhnawm a, bul ṭan ṭha zawk chu Spain an ni - Brazilian defender Wesley chuan minute 5-na lekah an lamah a ti lut. Mahse, Brazil hian Lincoln Dos Santos leh Paulinho Filho hmangin first half-ah an si phurh sut zo vek a, hnehna an chang.

Inrinni zan inkhel dangah Germany U17 chuan rinlawk ang ngeiin hnehna an chang bawk a, Costa Rica chu 2-1 in an hneh. Iran rawlthar rual ten hmabak an nei êng tih lantir nan Guinea chu 3-1 in an sawp a, Group C-a ngaihnawm chho dawn.

Germany tan World Cup hma hauha ngaihven hlawh Jann-Fiete Arp-a'n Europe club lianten an duh chhan a pholang nghal a, goal a khung. Germany goal dang hi Noah Awuku khung a ni a, Costa Rica tana Andres Gomez goal khungin awmzia a nei thui lo.

Team incho tawk Iran leh Guinea inkhel first half-ah goal hmuh tur awm lo mah se second half-ah goal li ngawt a lut - Iran tan Sayyad Allahyar (59'), Sharifi Mohammad (70' pen) leh Saeid Karimi (90') ten goal khat ṭheuh an khung a, Guinea tana Fandje Toure (90+1') goal khung chu an mualpho zualpui khuhna chauh a ni tawh.