Hnehna changtu Hamilton tan nomawi a hnai
Lewis Hamilton chuan Japanese Grand Prix-ah hnehna a chang a, Formula 1 world champion ni turin a dinhmun a ṭha tawh hle. Nimina intlansiakah hian Ferrari an talbuai leh, championship lama Hamilton-a elpui ber Sebastian Vettel chu a tlan tluan ve thei lo a, a teammate Kimi Raikkonen chu panganaah a thleng thung.
Suzuka circuit-a intlansiakah lap 53 an tlan zawh hnuah Mercedes driver Hamilton hi intlansiak hnuhnung zawk Malaysia GP lama pakhatna Max Verstappen lakah second 1.2 a hmain a thleng a, tun season chhunga pakhatna vawi riat a nihna a ni a, Japan-a Formula 1 intlansiak bikah hian ṭum thum hnehna a channa chiah a ni bawk.
World champion vawi thum ni tawh Hamilton hian amah hnaih bertu Vettel aiin point 59 zetin hma a hruai fal ta a, tun season-ah intlansiak hmabak pali bak an nei tawh lo. October 23 hian United States Grand Prix tlan a ni leh dawn a, British driver Hamilton hian hnehna a chang a, a elpui Vettel chu palina chinaH a thleng phak lo a nih chuan a vawi li nan woorld champion a ni tawh ang.
Kawng a inhawng
Japanese GP-ah hian Hamilton, Vettel leh Verstappen te kha driver inel ber tura ngaih an ni. Mahse, qualifier lamah Ferrari an chetṭhat loh avangin intlansiakna tak ṭan a nih hma
aṭangin Vettel a dinhmun a hniam sa. Red Bull driver hlui Vettel hi lap thum bak a tlan ve thei lo - Ferrari team talbuaina hi Hamilton tan hnehna a chan theih nana kawng siamsaktu pawimawh a ni.
Lap hnuhnung ber an tlan laiin Hamilton hian a motor ke (tyre) a chian loh thu a sawi a, Dutch driver Verstappen-a'n na takin nawr theihna hun a neih phah. Mahse, hun harsaah Hamilton hian a tawnhriat neih ngah leh driver ṭha bik a nihna a lantir thei a, huaisen takin hnehna a chang.
Kum 32 mi Hamilton chuan, "Intlansiak hmabak pali nei chungin hetiang tak hian ka fal thei ang tih ka ring phak bik lo, a tirah kha chuan duhthsam mai a ni a, tunah chuan a takin a thleng dik ta. Ka team te an che ṭha em em a, hnehna ka chan theih nan hian theihtawp an chhuah a ni," tiin a sawi.
Inelna a la zawh loh thu sawiin Hamilton chuan, "Ferrari hian season bul ṭha takin an ṭan a, rei tak chhung chu inelna an thunun bawk. Tun hnaiah an chebuai deuh a ni mai a, an rawn kir leh ang, inelna hi a la hautak dawn hle a ni," tiin a sawi.
Ferrari buaina
Europe-a an intlansiak lai thleng chuan Mercedes leh Ferrari an inel tawk hle a, champion tur zawk pawh rin thiam a harsa hle. Asia lamah intlansiakna neih chhunzawm a ni a, tun hma lama an chetṭhat tawh ṭhinna hmunah Ferrari an talbuai a, team champion ni tur pawhin insiamṭhat an mamawh tawh takzet.
Singapore GP tlan a ni a, he hmun hi Ferrari chetṭhatna ṭhin a ni. Mahse, lap khatna lekah Vettel leh Raikkonen an intai palh a, an team chanchina a vawi khat nan lap khatna lekah intlansiak an chhunzawm thei lo.
Malaysia GP an tlan zui leh a, qualfier lamah an talbuai avangin Vettel chuan a hnung aṭangin intlansiak bul a ṭan, German driver hian ropui taka a tlan hnuah palina dinhmun a luah laiin a elpui Hamilton chu pahnihna a ni. Nimina tlan zawh tak Japanese GP-ah erawh an vanneihna in a daih tawh lo, a vawi nga nana world champion nih beiseitu Vettel tan point beisei tur a awm ve ta lo a ni.
World champion vawi thum ni tawh Vettel chuan, "Sawiselna leh deusawhna hi chu tunhma aṭang tawha kan tawrh fo tawh a nih avangin ngaiah kan nei tawh. A pawimawh ber zawk chu engtin nge rang taka kan insiamṭhat theih ang tih hi a ni. Intlansiak hmabak pali kan la neihah hian thil mak thlentir theih ngei kan beisei," tiin a sawi.
Japanese GP Results
# Driver Team
1 Lewis Hamilton Mercedes
2 Max Verstappen Red Bull
3 Daniel Ricciardo Red Bull
4 Valtteri Bottas Mercedes
5 Kimi Raikkonen Ferrari
6 Esteban Ocon Force India
7 Sergio Perez Force India
8 Kevin Magnussen Haas
9 Romain Grosjean Haas
10 Felipe Massa Williams