FIFA World Cup 2018-ah Cristiano Ronaldo kan hmu dawn em?

Portugal-in zanin dar 12:15 hian Lisbon-ah Switzerland an mikhual dawn a, Russia ram pan turin point thum an mamawh.

Khawvel player ṭha berte zinga mi Cristiano Ronaldo chu FIFA World Cup khel lo thei dinhmunah a ding mek a, European champion Portugal dinhmun a derthawng.

Hmahruaitu inchuhna
Portugal-in nikum Septem­ber thla khan Basel-ah Switzer­land 2-0 in an hneh lo a, hemi hnu hian an match zawng zawng chak vek mah se La Nati (Switzerland sawina) hian an khingpui an hneh ve vek tho avangin Ronaldo te ram hi pahnihna a ni.

European champion tana thu lawmawm erawh Switzerland aiin goal an khung tam a, an goal difference a ṭhat zawk avangin an mualah hnehna an chan phawt chuan Russia ram an pan thei tho ang. Portugal hian an mualah match sarih chhung a zawnin an chak tawh a, hei hian inrintawkna a pe ang.

Real Madrid forward Ro­nal­do chuan Andorra an hma­chhawn ṭumin bench aṭangin a lut a, goal hmahruai a khung bakah Andre Silva goal khung tur a siamsak bawk. Zaninah Ronaldo hian en bik a hlawh dawn a, Portugal leh Switzerland inkhel tur hi a hmuhnawm ang.

France hi...
Tun hnaia player ṭha chher chhuak hnem ber zinga mi France-in an dinhmun tichiang turin match hnuhnung ber an mamawh. Zanin dar 12:15-ah Les Bleus-in point nga chiah la hmu Belarus an hmachhawn dawn.

France tan an mualah hna harsa awm tur awmin lang lo mah se Les Bleus hian Luxembourg an draw tawh a, hei bakah hian Belarus an tlawh hmasak ṭumin point khat bak an hlawh chhuak lo. Didier Deschamps hote hi Belarus lakah an chesual nawn a nih chuan playoff khel thei dinhmunah an ding.

Group A inkhel dangah Netherlands-in Sweden an mikhual dawn a, inkhel ngaih­nawm tak tura beisei ni mah se an intawn dawn meuh chuan boruak a dai hman. Hei hi a chhan chu FIFA World Cup qualifier-ah goal difference en a nih vang a ni a, Sweden hian an match hnuhnung berah Luxembourg 8-0 zeta an sawp avangin Netherlands tan beisei tur a tlem tawh hle.

Netherlands hian goal sarih tala chak an mamawh dawn a, captain Arjen Robben pawhin, "Sweden result kan hriat zawh kha chuan beisei tur kan nei tawh lo a ni ber. Belarus laka 8-0 a chak kha chu thil theih a ni lo a (3-1 in an chak), Sweden pawh hi 7-0 chuan kan hneh thei lo ang. Hun tawp thlengin kan theihna zawng zawng chu kan chhuah ang, mah se thil theih erawh a ni lo a ni," tiin beisei a bo tawh thu a sawi.

Zanin Inkhel Tur
Group A
France 12:15 AM Belarus
Luxembourg 12:15 AM Bulgaria
Netherlands 12:15 AM Sweden
Group B
Hungary 12:15 AM Faroe Islands
Latvia 12:15 AM Andorra
Portugal 12:15 AM Switzerland
Group H
Belgium 12:15 AM Cyprus
Estonia 12:15 AM Bosnia-Herzegovina
Greece 12:15 AM Gibraltar

An tlin theih dan
Group A
France-in a chhe ber pawh dawnin playoff dinhmun an hauh chiang tawh a, Belarus an hneh chuan result danga innghat loin World Cup khel turin an tling ang.
Sweden-in hmahruaitu ni turin Netherlands an hneh bakah France-in point an hloh a ṭul. Playoff khel pha tur chuan goal sarih aia tlema tlawm loh a tawk.
Netherlands tan playoff khel pha turin Sweden goal sariha hneh a ngai thung.
Group B
Switzerland tan hmahruaitu ni turin Portugal draw a tawk. An chak loh erawh chuan playoff an khelh a ngai dawn.
Portugal-in goal difference-a Switzerland aia an ṭhat zawk avangin hnehna an chang chuan World Cup khel turin an tling ang.
Group H
Belgium an tling tawh.
Greece-in pahnihna leh playoff khel pha turin Gibraltar hneh a tawk.
Bosnia and Herzegovina-in pa­hnihna dinhmun hauh turin Estonia an hneh a ngai a, Gibraltar lakah Greece-in point an hloh a ngai bawk.