Lionel Messi leh Argentina bukin an awm dawn
Football inelna ngaihhlut ber FIFA World Cup 2018 khel turin Lionel Messi telna Argentina dinhmun a la chiang lo a, Nilaini zing dar 5:00-ah South America aṭanga tling tur ram pali bakah playoff khel tur ram pakhat a hriat kim dawn. Messi leh a ṭhiante hi Ecuador khel turin Estadio Olimpico Atahualpa-ah an lenglut dawn.
Tun dinhmunah Jorge Sampaoli naute hi parukna an nih avangin kum 1970 hnua a vawi khat nan World Cup khel phak lo thei dinhmunah an ding mek. Mahse, Argentina hian Ecuador lakah hnehna an chang a nih phawt chuan Russia pan turin ticket an nei ang, an chunga awm Peru leh Colombia te an inkhel ve dawn bawk a ni.
Argentina manager Jorge Sampaoli chuan, "World Cup khel turin kan tling ang tih hi ka ring tlat a ni. Peru lakah goal khung theihna hun ṭha kan neih tam tak kan khawhral a, tun ṭumah erawh a goal tawh ngei ang. Kan team hi kan beidawng ngai lo a, inbuatsaihna kan neih ṭhat avangin a takah pawh kan hlawhtlin ka beisei," tiin a sawi.
Tlarhma hriam lo
World Cup hnuhnung berah khan Argentina hi pahnihna an ni a, final-ah Germany chu si khat faiin an ngam lo. Messi bakah Gonzalo Higuain, Paulo Dybala, Mauro Icardi, Angel Di Maria leh Sergio Aguero te an neih avangin qualifier hi an paltlang tura ngaih a ni.
Amaherawhchu, beisei leh thlirlawk angin thil a kal lo. Argentina hian match 17 an khelhah goal 16 chiah an khung a, anni aia khung tlem awmchhun chu Bolivia (14 goals) chiah an ni, minute 456 chhung (open play) zet chu goal an khung tawh lo! Qualifier-ah Messia-a'n match kua inkhel bul a ṭan
aṭangin goal li a khung tawh.
World champion vawi hnih ni tawh ram hian tun qualifier chhungin coach pahnih an ban tawh a, tuna an coach Sampaoli hi pathumna a ni. Sevilla manager hlui hian Juventus forward Dybala leh Messi te khelh duntir chu thil tih chi a nih loh thu a sawi tawh a, Peru lakah Dybala tan hmun a awm lo - season kal laia Turin club tana goal 12 khung tawh Dybala hi an ram mamawh chhanna a ni thei mai ang em tih chu zawhna lian tak pakhat a ni mek.
Inter Milan captain Mauro Icardi aia thlan zawk Boca Juniors striker Dario Benedetto-a'n Peru lakah an mamawh goal a pai lo a, Nilani zing hian Serie A lama hmatawng hmuhnawm pahnih Dybala leh Icardi te hian khelhna hmun an chan tawh beisei a ni.
Beiseina
Argentina hmachhawn tur Ecuador hian World Cup 2018 khelh beiseina an nei tawh lo a, an match hnuhnung pangaah tlawm vekin hengah te hian goal hnih zel chhuah ang an ni. Tun
ṭumah hian hrem vangin an player pawimawh Antonio Valencia leh Michael Arroyo te an chhawr thei dawn lo - Messi leh a ṭhiante tan chanchin ṭha a ni ang.
Ecuador coach Jorge Celico hi Argentine a ni a, Celico hian an ram team a hneh a nih chuan an ram mipui a ṭahtir dawn tihna a ni. Celico chuan, "Kan suangtuah loh thil kha kan koah a tla ta si a, tunah chuan Ecuador tana hna thawk lai ka ni a, he ram mipuite hi ka ngainain tun ṭumah pawh hian kan theihtawp kan chhuah ang," tiin a sawi.
Argentina leh Ecuador te hi vawi 33 an inhmachhawn tawh a, Argentina hian record nei ṭha zawkin vawi 18 hnehna an chang a, ṭum nga an chak lo thung - match 10 dang chu chak zawk awm loin an ṭin. An intawn hnuhnung ber chu kum 2015 October 8 kha niin Ecuador hian 2-0 in hnehna an chang.
Thi leh dam
Table-a palina Colombia chu an hnuai chiaha awm Peru khel turin an zin chhuak dawn. Ram pahnihte inkarah point khat chiah a awm a, parukna Argentina leh pasarihna Paraguay te tan lehpelh theih an la ni - a chak zawk tan World Cup a chiang dawn a, an inhnehtawk a nih chuan inkhel dangah Argentina leh Paraguay ten hnehna an chang a nih si chuan Peru an tla ang, thih leh dam kara leng an ni.
Copa America champion Chile chuan tling chiang tawh Brazil an lenchilh dawn, ram 10 inel zingah Brazil chiah hi tling chiang an la awm a, an hnung zui tur ram dang pathum bakah playoff khel tur ram pakhat chinfelna hun a nih avangin Nilaini zing hian South America ramte chuan football an thlir ṭhup dawn tih a chiang.
October 11, Nilaini Zing
Paraguay 5:00 AM Venezuela
Brazil 5:00 AM Chile
Ecuador 5:00 AM Argentina
Peru 5:00 AM Colombia
Uruguay 5:00 AM Bolivia
Team Dinhmun
# Team Pld W D L GF GA GD Pts
1 Brazil 17 11 5 1 38 11 27 38
2 Uruguay 17 8 4 5 28 18 10 28
3 Chile 17 8 2 7 26 24 2 26
4 Colombia 17 7 5 5 20 18 2 26
5 Peru 17 7 4 6 26 25 1 25
6 Argentina 17 6 7 4 16 15 1 25
7 Paraguay 17 7 3 7 19 24 -5 24
8 Ecuador 17 6 2 9 25 26 -1 20
9 Bolivia 17 4 2 11 14 34 -20 14
10 Venezuela 17 1 6 10 18 35 -17 9
Note : Match khat ṭheuh an la khel dawn a, palina chin an tlang nghal ang a; panganain playoff an khelh a ngai ang.