Nadal tan nomawi parukna

Pathianni zan khan Rafael Nadal chuan Nick Kyrgios chu 6-2, 6-1 a hnehin China Open nomawi a chawi a, tun season chhunga title paruk a lakna niin tennis a khelh hun chhungah nomawi 75 a chawina chiah a ni bawk.

World number 1 Na­dal hian a zawnin match 12 hnehna a chang ta a, Beijing-a China Open final-ah pawh hian Australian tlangval Kyr­gios lakah set hmasa zawkah 2-2 an ni hman tih mai loh chu harsatna dang a tawk miah lo - darkar khat leh minute 32 chhung lekin hnehna a chang.

Grand Slam vawi 16 champion tawh Nadal hi tun tournament-a a match hmasa berah Lucas Pouille nen an inkhelh ṭumin a chak lo teuh hle, a khingpuiin match point ṭum hnih a hmuh tawh chu a pawt thla thei hram, hemi hnuah erawh a hawi kir tawh lo.

Kum 31 mi Nadal chuan, "Kum 2005 khan he hmunah hian hlawhtlinna ka lo chang tawh a, kawng hrang hrangin he inelna hian hma a sawn tawh hle. Ka champion hmasak kha chuan inelna hi ATP 250 a ni a, tunah chuan ATP 500 a ni tawh, ka hun tawn hmasa ai kha chuan a ropuiin a hlimawm hle a ni," tiin a sawi.

Spain tlangval Nadal hian world ranking-ah amah hnaih bertu Roger Federer aiin point 2,360 zetin hma a hruai fal tawh a, number 1 ni chunga season khar thei turin a dinhmun a sawhnghet chho tawh hle a ni.