Ramhlun North-ah defender thar

Mizoram Premier League Season 6-ah Ramhlun North-in result ṭha neih beiseiin squad an inthuam ṭha a, Liberian defender Korhena A. Boekai an la lut.

Minerva Punjab FC leh Kenkre FC tana khel tawh Korhena hian Ṭhuamluaia Mualah a match hmasa ber a khel ang.

Nimin khan Ramhlun North-in Lunglei an pan a, Korhena bakah hian Liberian midfielder Harry Delona Morris Jr. te chu zin zingah an tel. MPL club hian Tripura keeper Mahmud Ul Hassan chu trial turin an ko bawk a, training-naa beisei a phak chuan cotract an ziahpui ang.

Ramhlun North hian October 12, tlai dar 2:15-ah Bethlehem Vengthlang an hmachhawn dawn a, BVT pawh hian nimin khan Leitlangpui lam an pan ve bawk.

MPL6 Phase 1 khelh zawhah Ramhlun North hian point nga chiah an hmu a, table mawngphaha awm Dinthar FC nen an point hmuh zat a inang. Samson Ramengmawia enkawl team hi an dinhmun ṭha lo mah se point aṭanga thlir chuan semifinal khel pha china awm Aizawl FC chu point li chiahin an pha lo a, Ṭhuamluaia Muala result ṭha neih a pawimawh ang.

Ramhlun North manager K. Lalenghluna (Maenga) chuan, "Kan club hian semifinal thlen ngei kan tum a, chu mi tur chuan player pawh kan lak belh a ni. Result ṭha kan neih theihna tur a nih phawt chuan kan la inlak belh ang," tiin Vanglaini a hrilh. Tualchhung football transfer hi October thla chhung hawn a ni.