World Cup 2018 khel tur Egypt
Egypt chuan kum 28 hnua a vawi khat nan FIFA World Cup an khel leh dawn ta. Pathianni zan African qualifier inkhelah Egypt hian an mikhual Congo chu 2-1 in an hneh a, Liverpool forward Mohamed Salah chuan goal hnih a khung.
Borg El Arab Stadium-a inkhelah AS Roma aṭanga Liverpool zawmtu Salah chuan Arsenal midfielder Mohamed El Nenny ball pek hmang ṭangkaiin minute 63-naah goal hmahruai a khung a, he goal hian Russia a hruai thleng ngei dawn niin a lang hman.
Mahse, minute 88-naah defender Arnold Bouka-Moutou chuan Egypt goalkeeper Essam El Hadary dan theih loha volley lutin an si phurh a sut ta mai, an mualah Pharaohs (Egypt sawina) an hawihai hle. Minute nga pekbelh an ni a, hun tawp hma chiaha Egypt-in penalty an hmu chu goal hmahruai khungtu Salah-a'n khung lehin an ram mipui a lamtir.
Egypt hian African Cup of Nations-ah nomawi vawi sarih chawiin an khawmualpui bikah chuan record nei ṭha ber an ni a, khawvel huap inelna World Cup-ah erawh record an nei ṭha tawk lo, tun ṭum hi vawi thum an khelhna tur niin kum 1990 hnua an khelh lehna hmasa ber tur a ni.
Egypt coach Hector Cuper chuan, "Team enkawl hna ka thawh ve tawh chinah chuan World Cup boruak aia lian hi a la awm lo. Hun harsa leh boruak rit tak karah hnehna kan chang thei a, tunah chuan kan tum ram hmasa zawk chu kan thleng ta, inelna tak tak erawh kan la hmachhawn dawn chauh a ni," tiin a sawi.
Africa aṭang hian ram 20-in World Cup qualifier an khel a, group pangaah ṭhen hran an ni. Egypt hi Group E-ah awmin match nga an khelhah point 12 an hmu a, anmahni hnaih bertu Uganda (8 points) tan umphak theih an ni tawh lo, match khat khelh hmabak nei chungin an in pet tling a ni.