FIFA U17 World Cup ; England an vul; Goal a lut hnem
Young Lions (England sawina)-in an match hmasa berah champion an beisei ngam chhan an pholang nghal - team ṭha Chile chu 4-0 ngawtin an sawp. France-in inkhelh an thiam tih an pholang bawk a, New Caledonia lakah goal sarih an khung.
Pathianni zan U17 World Cup-ah goal a lut hnem a, Japan tan Keito Nakamura chuan hattrick a siam - Honduras lakah a team chu 6-1 in hnehna a chanpui a, an khelh dan enin champion beisei ngam tur an ni. Iraq leh Mexico inkhelah chak zawk an awm lo a, goal khat ve ve khungin an inhnehtawk.
The Sancho Show
South American U17 Championship 2017-a final lut thei Chile hmaah England-in fiahna hautak an hmachhawn tura ngaih a ni a, mah se England tan an thiam thil 'show' na mai a ni. Inkhel ṭan aṭanga minute ngana lekah Jadon Sancho chuan Chilean defender pahnih a bum a, Callum Hudson-Odoi tan awlsam taka goal khung tur a siamsak.
Minute 51-na a ni a, Sancho bawk a inlar - Borussia Dortmund winger hian Chilean goalkeeper Julio Borquez tihsual nangchingin an goal hnihna a khung. Minute kua a liam a, Sancho-a'n an goal thumna a khung chhunzawm nghal - Chilean goalkeeper Borquez a chet chhiat chhunzawm a, goal khung ngeina tur nia ngaiha chance neitu Rhian Brewster a ti tlu. Hnawhchhuah a ni a, feekick a chawi bawk. Manchester United rawlthar duhawm Angel Gomes chuan hei hi goal-ah a chantir a, England an chak chiang hle.
Hmabak eng Lions
England inkhelah sawisel tur a awm lo. Tlarhma lam an hmuhnawm tluk zetin tlarhnung an inrempui ṭha a, he team hian World Cup U17 nomawi an chawi haw a nih pawhin a mak lo ang. England fans tana thu lawmawm lo erawh Chile laka hmuhnawm khawpa khel Sancho-a'n group stage bak a khel dawn lo - hei hi a khelhna Dortmund-in group stage bak a khelh an phalsak loh vang a ni.
Young Lions-te indawm kun lutuk tur erawh an niin a lang lo. United Young Player of the Year chawimawina dawng thei Angel Gomes, Liverpool rawlthar duhawm Rhian Brewster, Chelsea-a inzir mek Callum Hudson-Odoi leh pre season tour-a United player chhaih mangangtu Manchester City rawlthar Phil Foden te an la nei tho a, Sancho awm loh an tuar lo ang.
France an thiam
Les Bleus (France sawina)-in a vawi khat nana World Cup khel New Caledonia lakah zahngaihna an lantir lo a, World Cup hautak zia hrilhfiah nan 7-1 ngawtin an sawp. France-in goal khung an harsat loh dawn tehlul nen Caledonia defender Bernard Iwa chuan minute ngana lekah an lamah a ti lut a, Amine Gouiri (goal hnih), Claudio Gomes leh Maxence Caqueret ten an chhunzawm ve bawk - Oceania aiawh tan Iwa chiah an lama ti luttu a ni lo a, Kiam Wanesse chuan an lamah a ti lut ve bawk.
Chawlhlawk hman a nihin France-in 6-0 in hma an hruai tawh a, chak tur a chiang tawh - heti chung hian Caledonia goalkeeper chet ṭhat thu sawi hmaih chi a la ni chuang lo! New Caledonia goalkeeper Une Kecine hian goal ngei tur nia ngaih chu vawi tam a dang a, heng zingah hian Caqueret-a penalty pet a dan chu a tel. New Caledonia tan hian World Cup-a an goal hmasa ber chu Sidri Wadenges chuan minute 90-naah a khung ve a, mah se France bawkin substitute Wilson Isidor hmanga khung ve lehin 7-1 in an chak ta a ni.
Japan an nep lo
France-in Group E-ah elpui tur an nei a nih chuan Japan an ni ang - Honduras chu 6-1 ngawtin an sawp thei. Japan tan hian Keito Nakamura chuan tun inelnaa hattrick hmasa ber a siam a, Mitsubishi Yowa forward hi Europe club ten an ngaihven vat a nih pawhin mak ti suh. Japan tan hian Barcelona forward hlui Takefusa Kubo, Taisei Miyashiro leh Toichi Suzuki te chuan goal khat ṭheuh an khung bawk a, Honduras tana Patrick Palacios goal khung chu an mualpho zualpui khuhna chauh a ni.
Mexico leh Iraq inkhelah chak zawk an awm lo a, team pahnih hi inkhel hmuhnawmah 1-1 in an ṭin - ram pahnih hi mahni khawmualpui champion ve ve an ni. Mexico hi CONCACAF U-17 Championship-a champion lai an ni a, Iraq hi AFC U-16 Championship champion lai an ni thung. Khawmualpui champion pahnih inhmachhawnah Mohammed Dawood chuan Iraq tan minute 16-naah goal hmahruai a khung a, Mexico tan Roberto de la Rosa chuan second half-ah a sut - Iraq-in U17 World Cup an khelh tawha point an hlawhchhuah hmasak ber a ni.
FIFA U17 World Cup
Inkhel Results
October 8, Pathianni Zan
New Caledonia 1 - 7 France
Chile 0 - 4 England
Honduras 1 - 6 Japan
Iraq 1 - 1 Mexico
Zanin Inkhel Tur
Costa Rica 5:00 PM Guinea
Spain 5:00 PM Niger
North Korea 8:00 PM Brazil
Iran 8:00 PM Germany