Number 1 thar Simona Halep

Simona Halep chu hmei­chhe tennis singles number 1 thar a ni. Romanian nula Halep hian Pathiannia khelh zawh tak China Open-ah French Open champion Jelena Ostapenko hnehin final a lut a, final a luh chiah hian ranking-ah a chung berah a awm dawn tih a chiang. Nomawi inchuhna inkhelah erawh Caroline Garcia chu 6-4, 7-6 (7-3) in a ngam lo a ni.

Kum 26 mi Halep hi tun hnaiah hmeichhe player zinga khel ṭha tluang berte zinga mi a ni a, Grand Slam final vawi hnih a khelh tawhah chak zo lo mah se inelna dangah sulhnu ṭha a hnutchhiah theih zel avangin Garbine Muguruza khumin a vawi khat nan a chung ber dinhmun a luah a ni.

World number 1 thar Halep chuan, "A chung berah ka awm dawn tih ka hriat avang khan mutthilh a harsa hle, a tuka final khel tur kan nih avangin mut ka tum a, ka thei chuang lo. Zinga ka practice lai pawhin ka rilruah thil dang a lut zel," tiin final an khelh hmaa number 1 a ni tih a hria chuan Garcia nen an inkhelh turah rilru a sentir theih loh phah thu a sawi.