Asian Cup thlen dil tur India

All India Football Federation (AIFF) chuan 2023 AFC Asian Cup thlen dil an tum a, thu chiang tak erawh a la awm lo. Asia khawmualpuia ram leh ram inelna sang ber thlen dil chungchang hi Inrinni khan AIFF Executive Committee chuan New Del­hi-ah an ngaihtuah a ni.

AIFF hian FIFA U17 World Cup an thleng mek a, FIFA pawm sa thlap stadium engemaw zat an neihsa avangin India tan Asian Cup thlen hi a awlsam tura ngaih a ni. Hetihlai hian India hian Asian Cup 2023 hi thlen an tum dawn a nih chuan China leh South Korea an khin a ṭul dawn a, ram pahnih hian Asian Cup 2023 thlen an duh thu hi an tichiang tawh.

Kum 2019 AFC Asian Cup chu UAE-ah nghah a ni dawn a, he inelnaa inpetkai tur hian India hian qualifier-ah match khat chak bak an mamawh tawh lo. October 11 khian Macau an mikhual dawn a, hnehna an chang a nih chuan Asian Cup 2019 khel turin an tling dawn a ni.

Tun hnaiah AIFF hian India rama football-in ngaihven a hlawh theih nan nasa takin hma an la a, U17 World Cup an thlen mek bakah hian 2019 FIFA U20 World Cup thlen dil turin thu­tlukna an siam fel tawh - an dinhmun hi tun World Cup an thlen dan hian a hril thui hle ang.