MPL khelhna tur Ṭhuamluaia Mual

Lungleiah Mizoram Premier League khelh a ni dawn. MPL6 Round 8 khelhna tur Ṭhuamluaia Mual hian chanchin ngaihnawm tak a nei a, he hmun zawl nuam tak hi 'savun hampuar' petna tura duan satliah a ni lo.

Ṭhuamluaia Mual hi tun dinhmunah chuan Lungleia mual puitling leh tournament pangngai khelhna tur awm chhun a ni a, phullem phahna mual Mizoramin a neih pali zinga pakhat a ni.

Dubhi Mual tia hriat ṭhin Ṭhuamluaia Mual hi September 10, 2009-a Lunglei District Sports Committee General Meeting chuan LDSC Ground No-1 tih ṭhin chu Ṭhuam­luaia Mual tiin a thlak.

A hming hi Mizo pa ropui C.Ṭhuamluaia hming chawia sak a ni a, mual luhna Gate bulah Ṭhuamluaia Lim (Statue) hmuh tur pawh a awm.

Thisena lei

Ṭhuamluaia Mual hi awlsam taka mipuiin an neih a ni lo a, thisen chhuak meuh a, hruaitu hmasa ten an sual chhuah a ni.

He mual bul lawkah hian Lunglei Govt High School a awm ṭhin a, an headmaster chu C. Ṭhuamluaia a ni. Sipai leh mipui (High School naupang) ten mual hi inremsiamin an inhman-

ṭawm ṭhin a, buaina lutuk an nei ngai lo.

Kum 1952 khan thil duhawm lo, kan vanneihpui ta chu thlengin mual hman chungchangah sipai leh High School naupang an inhmuthiam lo ta tlat. Buaina chhuah chhan hi sawi dan hrang hrang a awm.

Hetih hunlaia he school a kal, pawl 9 zirlai, hmaichhan ngeia ka biak, Dr. Hranghrima chuan, “Sipaite hian an hun bawhpelhin mual an la hmang tlat mai a, High School naupangte chuan inkhelh duh tawh mahse mualah sipai an la inkhel reng mai si, tihngaihna dang awm hek lo le, an ball an pet liam sak a, buaina a awm zui ta a ni,” a ti.

Amaherawhchu, buaina chhuah lai hian a hmunah a awm ve loh avangin a ṭhiante ṭawngka emaw aṭanga a hriat ve tho a ni. Ṭhenkhat chuan sipai hian naupang inkhel lai an hnawtdarh niin an sawi thung.

Tichuan le, school naupang te chu sipai lamin luhchhuahin an lehkhabute an paih darhsak a, zirlai ho nen chuan an insual buai zui ta chiam mai a ni. Hrima sawi zui danin : He an buai thu hi thingpui dawra chawl mek school naupangte chuan an hre ve thuai a, an zinga mi KL Rochama (ex- MLA) chu mualah a tlan thla nghal a, sipaite chu kuttum nen a hmachhawn a, huaisen taka sipai a hmachhawnnaah a kut zungte invuahna lai a tikhaw lo va, tun thleng hian a la khuar nghe nghe.

Hemi ṭuma an inbei hi a nep lo hle a, talhfiak, thingfak, lungtum leh kuttum pawh a leng nasa hle. He school a kal ve, lehkha thiam thei tak, Thingsai tlangval Dengphalova chu a ṭang hle a, sipai pakhat chu lunga den hial a tum a, amaherawhchu, a lung chawi a rih lutuk avangin a den tum sipai awmna a deng pha ta lo va, ‘a hming nen pawh a inrem viau e,’ an ti.

He buaina avang hian hliam tuar neuh neuh an awm a, zan lamah boruak a la sang viau a, zirlai naupangte lengchhuak lo tura tih an ni. C. Ṭhuamluaia ruahmannain zirlai kut tuarte chu thiam takin an nuar a, naupangten school an kal duh loh avangin sorkar milian leh sipai hotute beng a thleng thuai a, mual chu vantlang ta a nihzia au chhuahpuiin SDO hmaah Assam Rifle ho nen chuan an inkhing a, a tawpah hnehna changin SDO in mual chu vantlang ta nih tawh turin thu a rem ta a ni.

Kan mual

Tunah chuan Ṭhuamluaia Mualah 'artificial grass' phah a ni tawh a, a changtlung thawkhat tawh hle. MFA Cup 2017 an nghahna hmun hi Mizoram huap tournament khelh na’n pawh a iaiawm lo hle. Amaherawchu, kan dim thiam tawk loh avangin grass a bet tlat a, kaihthawh a awm chuang bawk si lo! Motor lian tlan luh an sim loh avangin Pavillion hnaih lam phei chu a khuar nasa bik hle. Ruahsur nikhua pawhin tui a luang ral zung zung thei lo va, inkhel a khaihlak hial ṭhin.

Ṭhuamluaia Mualin Mizoram chhunga football inlena sang ber chu October 12-13 hian a thleng dawn ta a, media box leh ṭul dang awm lo a la tam - kan hriatthiam phawt a la ṭul a ni! Phuahchawpin MPL khelh a ngai dawn a, official pavilion a official rih lo hle a, substitute player leh team official te nen inpawlhsawp a ngai fo.

Tuna official pavilion atana hman mek chung chiah hi sak belh a nih hunah erawh video coverage atan pawh harsatna a awm tawh lo turah ngaih a ni (hei erawh hmathlir). A hungna duhthusam lo pawh changtlung zawka siam a ni dawn hnai a, kum khat hnu velah chuan mawi taka hung chhuah a nih a rinawm. Zun ram thiarna pawh duhthusam a changtlung a awm thuai beisei a ni bawk.

Mizorama mual ṭha ber anga an sawi hial ṭhin Ṭhuamluaia Mual hi Lunglei a mual puitling awmchhun niin, kan mi hmasaten thisen chhuak meuha an lei a ni a, mual dang zawng aiin a hlu a, duat pawh a phu hle.

A chhunga i pen luh a, a phullem i rah hun chuan:

‘He hmuna zalen taka i leu vel theih na’n hian, mihuaisente thisen a far tawh a, a vaivut hi an thlan leh thisena luan a lo ni tawh’ tih i hre reng dawn nia.

(He thuziak hi ZoFooty admin Lawmkima Hmar ziah a ni a, www.zofooty.com aṭanga lakchhawn a ni)