England chakna Kane bawk

World Cup khel tura tling chiang tawh England-in an qualifier match hnuhnung berah Lithuania chu 1-0 in an hneh a, he inkhela goal awmchhun khungtu chu captain Harry Kane a ni - Tottenham striker hian England tan captain armband vawi li a hreng tawh a, goal a khung vek. Thawhṭanni zan inkhelah pawh hian Dele Alli penalty hlawhchhuah chu goal-ah a chantir a ni.

England manager Gareth Southgate-a'n nakkumah Russia an pan dawn tih a chian tawh avangin in enchhinna hun atan a hmang a, Tottenham Hotspur midfielder Harry Winks leh Leicester City defender Harry Maguire-te chu ram tana an match hmasa ber khelhtir an ni.

Southgate hian a vawi khat nan tlarhnungah defender pathum din tirin a enchhin bawk a, Everton midfielder Michael Keane, Leicester City defender Maguire leh Manchester City defender John Stones te a din tlar tir. Lithuania lakah England tlarhnung a nghing a, Lithuania hian tlarhmaah player nei ṭha ngat se chuan England hi an chak kher lo ang. Three Lions hian November-ah Brazil leh Germany chu friendly match an khelhpui dawn a, tlarhnunga defender pathum hi ram lian pahnih lakah hian an hlawhtlinpui a nih chuan Russia-ah pawh an hman chhunzawm a rinawm.

England tan goalkeeper Jack Butland-a'n a hun neih ṭhatah ram tana khelh a phu zia a pho­lang a, Three Lions tana a match hmasa berah Winks a khel ṭha hle bawk - tun season-a Spurs tana league match li chiaha inkhel bul la ṭan midfielder hian vawi 92 ngawt pass a nei a, England player zingah a ni tluka pass nei ngah an awm lo.

England coach Gareth South­gate chuan, "Ball kha kan thunun ṭha a, kan game siam kawngah Winks khan a khel ṭha hle. Ka ngaihdan chuan tu pawh tum ila England kawr i hak tawh chuan he kawr ropui tak hak hi i tlin em tih chu ka en hmasak ber ṭhin a ni a, Winks khan a phu zia a pholangin ka hria," tiin a sawi.