Chelsea-in chakin season an khar

Chelsea-in Champions League khel turin point khat chauh an mamawh a, Frank Lampard-a hote 'draw'-ah an lungawi lo - Europa League khelh tum Wolverhampton Wanderers 2-0 in an hneh. Stamford Bridge-a inkhelah hian player thar Timo Werner pawhin inkhel a en a, FA Cup final an la khel dawn bawk nen London club tan chanchin ṭha hlir a ni.

Blues-in inkhel thunun mah se goal erawh an khung lawk lo. First half injury time-ah Chelsea rawlthar duhawm Mason Mount-a'n freekick aṭangin mawi zetin a khung a, Olivier Giroud-a'n hun pawimawhah a zia chhuahin goal pawimawh a khung bawk.

Wolves tlarhnung a phui tawk lo a, chutihrualin Chelsea thiamna hmuh hmaih a thiang lo. Kum 21 mi Mount-a'n hun pawimawhah freekick a khung a, Premier League a khelh hmasak ber season-ah match 31 inlanin goal sarih a khung thei a, hmabak a nei êng hle.

Lampard-a'n Chelsea a enkawl tirhin Giroud a ring tawk lo a, tunah erawh FIFA World Cup champion tawh player a ring ta - a tisual lo. French striker hian Christian Pulisic leh Mount te thawhrah sengin goal hlu zet a khung a, nuam sa takin London club-in second half-ah hahdam zawka inkhel theiin goal erawh a luh belh tawh lo.