Team hmuhnawm India an tlawm
Indian rawlthar rual ten an theihna zawng zawng nen khel chhuak mah se Colombia laka chak nan a tling tawk lo, FIFA World Cup Under 17 inelna an match hnihnaah 2-1 in an tlawm a, mahse Delhi khawpuia Indian rawlthar rualte inpekna chu fak rawn a ni.
Manipur rawlthar duhawm Jeakson Singh Thounaojam-a'n FIFA tournament-a India goal hmasa ber khung mah se mipui tluklehdingawn hlimna hian minute khat pawh a daih lo. Colombia goal hmahruai khungtu Juan Penaloza-a'n a vawi hnih nan goal a khung leh nghal a, India a tlawm.
Tute nge khel?
USA lakah India an tlawm tawh avangin coach Luis Norton de Matos-a'n last 16 luh beiseina nei tur chuan tlawm nawn a thiang tawh lo tih a hria - starting eleven-ah player pali ngawt a thlak danglam. Tlarhnung laiah Jitendra Singh aiah Namit Deshpande dah a ni a, hrem a nihna a tawrh zawh hnuah Boris Thangjam chu right back ni turin inkhel bul ṭantir a ni bawk.
Rin loh takin a match hmasa bera khel ṭha em em mai Komal Thatal chu bench-ah dah a ni a, Rahul Kannoly-a'n mual veilam sir a luah. Captain hmuhnawm Amarjit Singh chu Jeakson Singh nen midfield laiah inkawp tir an ni a, tlarhmaah Aniket Yadav aia thlan chu Rahim Ali a ni. Mizo rawlthar Lalengmawia tan hmun a awm lo a, Portuguese coach-in 4-4-1-1 formation a hmang.
Lawmna a rei lo
FIFA World Cup eng level-ah pawh India an la inlan ngai lo a, U17 World Cup hi a thlengtu nih vang chauha khel thei kan ni. Chumi ngaihtuah chunga thlir chuan India khel a hmuhnawm takzet a, hmabak a eng tih hmuh hmaih rual a ni lo. India tan Abhijit Sarkar leh Ninthoinganba Meetei ten mawi zeta an in one-two hnua goal an khung theih lohte, Rahul Kannoly-a'n Boris hnen aṭanga a ball hmuh bar pet per nana a hmante chu India-in a sawi reng tawh turte an ni.
Chawlhlawkah standing ovation nen meuh Indian team te thlah ni mah se second half-ah goal an chhuah hma a, mual veilam sirah Sanjeev Stalin-a'n a hnathawh tur a thawh
ṭhat tawk loh avangin vengtu nei lo Juan Penaloza chuan hmahruaina goal a khung. India-in Nongdamba Naorem hmanga an hun ṭha neih an chhawr loh hnuah Sanjeev-a corner pet aṭanga ball kal chu Jeakson-a'n goal-ah a chantir a, India lawm chhung erawh a rei lo - an goal khung an lawm luatah tlarhnung an ngaihthah a, an hlim authawm pawh a reh fel hmain Penaloza bawkin goal a khung. Hun tawp thlengin goal dang a lut tawh lo a, India an tlawm. India hian October 12-ah Ghana nen an match thumna an khel leh ang.
Mahse, lawm ila...
India tan USA laka a hmuhnawm tawh ang bawkin goalkeeper Dheeraj Singh a hmuhnawm a, Colombia lakah pawh vawi hnih ngawt save ropui a nei. India coach Luis Matos chuan, "Dheeraj khan a khel ṭha thlawt a, a hmabak a eng em em a ni," tiin beiseina a neih san pui hle.
Right back Boris Thangjam-a'n fak a phu a, mual ding lam sirah a hnathawh tur dik tak thawkin counter attack-ah a hlauhawm thei hle. Second half-ah striker Aniket Yadav luhtir chauh ni mah se World Cup hma hauha sawi hlawh striker hian theihna a nei sang tih a pholang nawn a, Colombia tlarhnung chhaih mangang ṭhintu Rahul Kannoly leh tlarhnung ban rinawm Anwar Ali hming lam hmaih a thiang lo.
Matos a hlim
India coach Luis Matos chuan, "Kan theihna zawng zawng kan pe tih ka hriat avangin hlim tak leh hahdam takin ka mu ang. Thla ruk liam ta lawkah kha chuan South American team-te nena inel tawk taka khelh hi mang ram mai a la ni a, zaninah erawh ka nauten kan intluk tlang reng a ni tih an pholang a ni," tiin chak lo mah se a naute a fak.
Benfica B team boss hlui chuan sawi chhunzawmin, "Kan result avangin ka lawm lo a, kan hmachhawn apiangin khelhpui harsa min tih thu sawi mah se goal hmaa kha aia hriam zawk kha kan zir a ngai a ni. Goal kan khung hnua kan inthlahdul hman kha a pawi takzet. Ka naute tan chuan an goal khung kha mumang ang mai a ni a, an hlim luatah an chesual a ni. 1-1 khan inkhel tawp se chuan result ṭha tak a ni, kan ti mai tur," a ti a, an hun ṭha neih an bawh pelh chu a ui hle.
India faktu Orlando
Colombian coach Orlando Restrepo chuan, "Hun tawp lam minute 15 chhung kha chu rilru a hah takzet a, India-in goal an rawn khung phei kha chuan rilru a hah hle. Game inhnehtawk leh boruak sang tak a ni a, India khelh dan avang khan kan game khelh dan pawh tam taka thlak danglam a ngaih phah," a ti.
Orlando chuan Indian tlarhnung fak nghalin, "India centre back pahnih kha awihawm loh khawpin an khel ṭha a, paltlang an hautak takzet. Game hmuhnawm tak an pholang a ni," a ti a, tlarhnung laia khel ṭha Anwar Ali leh Namit Deshpande te a fak.