Asian Cup Qualifier India tan vawi khat chak a tawk
FIFA U17 World Cup-ah India-in khel ṭha chungin result duhawm hlawh chhuak thei lo mah se Indian football fan-te tan hlimna tur a awm - AFC Asian Cup 2019 khel turin India tan match khat chiah chak a ngai tawh.
India hian zanin dar 7:00-ah Bangalore khawpuiah Macau an mikhual dawn a, Sree Kanteerava Stadium-ah hnehna an chang a nih chuan kum 2019-a UAE pan turin an tling ang. Inkhel hi Star Sports 1 chuan live-in a pe chhuak dawn a ni.
Hmanah chuan...
Kum 2008 AFC Challenge Cup-ah khan Bob Houghton kaihhruaina hnuaiah India an champion a, 2011 AFC Asian Cup khel turin an inpet tling nghal - kum 27 hnua India-in Asian Cup an khelh hmasak ber a ni. Group stage-ah India an tlawm vek a, Australia, South Korea leh Bahrain-te nen awmho miau avangin dem an hlawh lo.
AFC Asian Cup a-
ṭanga pet tlak an nih hnuah Bob Houghton-a'n a hna a thawh chhunzawm a, AFC Challenge Cup qualifier-ah India kaihruaiin awlsam takin hnehna chanpui vek mah se AIFF nen an inhmuh thiam loh avangin ban a ni. China leh Uzbekistan coach hlui ban a nih hnuin India-in ngai a awh leh tawh lo a, 2015 Asian Cup-ah an tling lo chiang hle.
Tunah chuan...
India-in Bob Houghton a ban hnuah Armando Colaco, Savio Medeira leh Wim Koevermans-te a ruai a, beisei an phak lo vek. Kum 2015-ah Stephen Constantine lakluh a ni a, British coach hnuaiah hian India-in FIFA ranking-ah top 100 huang chhungah lai pen lutin tunah chuan Asian Cup khel turin pen khat chiah an hmabak ta.
Constantine hnuaia India insiamṭhatnaah Mizo tlangval Jeje Lapekhlua chu player pawimawh a ni a, Macau hmachhawn tur squad-ah hian Jerry Lalrinzuala leh Lalruatthara an awm bawk. Jerry leh Ruatthara ten inkhel bul an ṭan a beiseiawm lo a, Hnahthial tlangval Jeje erawh harsatna a awm thut a nih loh chuan inkhel bul a ṭan ang.
India dinhmun
Group A-ah India hi Myanmar, Kyrgyzstan leh Macau te nen an awmho vek a, vawi khat ṭheuh an hmachhawn tawhah hnehna an chang vek. India-in point kua an neih tawh laiin anmahni hnaih bertu Myanmar leh Kyrgyzstan-in point thum ve ve an hmuh avangin India tan vawi khat chiah chak a ngai tawh.
India coach Stephen Constantine chuan, "Eng team pawh hi ngaihnep tur an ni lo a, hnehna chang tur chuan fimkhur taka kan khelh a ṭul ang. Engtiklai pawhin kan inring tur a ni a, goal khung tum luatah counter attacking lam inven hman loh pawh kan hlau tur a ni. Ka naute an thawkrim ṭhin a, an thawhrimna avanga tun dinhmun thleng kan ni," tiin a naute inpekna a fak nghal.