Syria mipui veltu Cahill

Kum 37 lai ni tawh mah se Syria ram pumpui ṭah tir turin Tim Cahill a la ṭha tawk - Nimin khan AFC World Cup qualifier playoff-ah ram pahnih an inhmachhawn a, hun pangngaiah 1-1 a an inhnehtawk hnuin Cahill hian chakna goal a khung a, inkhel hmasa nena belhkhawmin Australia hi 3-2 in an chak.

Ram pahnih inhmachhawn hmasakah 1-1 in an inhnehtawk tawh a, khualmuala goal neitu Australia dinhmun a ṭha zawkah ngaih a ni. Mahse, tualchhung buaina avanga ram buai tak ni mek Syria-in minute rukna lekah Australia an barakhaih a, Omar Al Somah chuan Syria tan goal a khung.

Mahse, Australia-in Syria neih loh an nei a, a hming chu Cahill a ni. Everton midfielder hlui hian minute 13-naah an si phurh sutna goal a khung a, extra time khelh a nih hnu minute 109-naah chakna goal a khung zui. Hun tawp nan minute hnih chiah a awm tawh tihin Al Somah chuan freekick aṭangin post a pet per a, hun tawp thlengin Australia thin thiin an awm bik lo - Syria hi minute 94-naa Mahmoud Al Mawas hnawhchhuah a nih avangin 10-in an khel.

Australia-in World Cup khel turin CONCACAF-a palina nena playoff an khelh a la ngai dawn a, Panama, Honduras leh USA zingah an tum tur a la chiang lo.