PBL khel turin Prannoy man a tam

Premier Badminton League season thumna khel tur player lilamna chu Thawhṭanni zan khan neih a ni a, Indian shuttler zingah nuai 62 man HS Prannoy chu player manto ber niin Ahmedabad Smash Masters tan a khel ang.

Tun hnaia che ṭha tak Kidambi Srikanth chu Awadhe Warriors tan cheng nuai 56.1 in a khel chhunzawm ang. Srikanth hian tun hnaiah Indonesia leh Australia-ah hlawhtlinna a chang a, PBL-ah pawh player hmuhnawm a ni ang.

Team pariat tel tur ten Indian player ṭha an inchuh na a, player beiseiawm Sameer Verma chu Mumbai Rockets-in nuai 52 in an la a, North East Warriors chuan nuai 54-in Ajay Jayaram an lalut thung.

Hmeichhe lamah PV Sindhu leh Saina Nehwal te chu an club khelhna Chennai Smashers leh Awadhe Warriors tan an khel chhunzawm thung dawn a ni.

Season hmasa khan Sindhu hian Chennai Smashers chu nomawi a chawi pui a, Rio Olympic leh World Cham­pionship-a silver medal la theitu Sindhu hi hmeichhe player dang tan hmachhawn a châkawm loh khawp ang. Kum 22 mi Sindhu hian tun season-ah hian nuai 48.75 a hlawh dawn.

India nula zinga Olympic badminton inelna huanga medal la thei hmasa ber Saina chu Awadhe Warriors-in nuai 41.25 in an nei nawn. Season hmasa khan Saina hian a team hi semifinal a thlen pui a, Chennai Smashers lakah 4-1 in an chak lo.

Hyderabad Hunters chuan Rio Olympics gold medallist Carolina Marin chu nuai 50-in an lei a, season hmasa aiin nuai 11.5 in a man a to zawk. Mipa world number 1 thar Viktor Axelsen leh Spain nula Marin man a inzat. Denmark tlangval Axelsen hian Bengaluru Blasters tan a khel ang. Chinese Taipei star Tzu Wei Wang chu North Eastern Warriors icon player tur niin a man zat chu nuai 52 a ni.

PBL season thumna hi kumin December 22 aṭanga khelh ṭan tur niin nakkum January 14-ah zawh a ni ang. Team pariat - Mumbai Rockets, Awadhe Warriors, Chennai Smashers, Hyderabad Hunters, Infinite Delhi Acers, North Eastern Warriors, Bengaluru Blasters leh Ahmedabad Smash Masters te an inel dawn.

Badminton Association of India secretary K. Ch. Punnaiah Choudhary chuan, "Player naupang chherchhuah kan duh a, team tin hian mipa emaw hmeichhia emaw under 17 player an nei ngei tur a ni. Badminton chawisanna tur a nih bakah player langsar ni lem lo te tan pawh kawng kawhhmuh theitu a nih ngei kan beisei," tiin a sawi.