USA leh Paraguay-in last 16 an lut

Thawhṭanni zan U17 World Cup-ah USA chuan 1-0 in Ghana an hneh a, last 16 an tling chiang tawh. Group B inkhelah Paraguay chuan 4-2 in New Zealand an sawp bawk a, last 16 khel turin an inpet tling ve bawk.

FIFA U17 World Cup-ah team 24 awmin group parukah team pali zela ṭhen hran an ni. Group hmahruaitu leh pahnihna chu last 16 lut chiang tur an ni a, pathumna zinga a ti ṭha zual paliin an lut bawk ang - USA leh Paraguay hi pahnihna aia an hniam theih tawh loh avangin last 16 an lut a ni.

Match hmasa bera a thlengtu India 3-0 ngawta sawptu USA-in Ghana lakah awlsam takin hnehna an chang bik lo - goal awmchhun khung tur hian minute 75 an nghah thlen a ngai. Ghana-in Sadiq Ibrahim leh Emmanuel Toku hmanga an hun ṭha neih an khawhral hnuah USA tan substitute Ayo Akinola chuan a hun a khawhral ve duh lo a, USA tan chakna goal a khung.

Paraguay-in Mali lakah 3-2 a hnehna changin goal khung an thiamzia an pholang tawh a, New Zealand lakah pawh zahngaihna an lantir chuang lo. Alan Rodriguez chuan minute hnihna lekah freekick hmangin goal ropui a khung a, mah se Alexis Duarte-a'n a vanduai zan a tawng - minute 14 chhungin an lamah vawi hnih a ti lut a, chawlhlawk a nih meuh chuan Kiwis lamin 2-1 in hma an hruai.

Mahse, Paraguay lamin second half-ah an theihna tak tak an pholang a, Anibal Vega (goal hnih) leh Blas Armoa hmanga goal dang khungin chiang takin hnehna an chang.

Group B inkhel dangah Mali chuan 3-0 ngawtin Turkey an sawp bawk a, Djemoussa Traore, Lassana N’Diaye leh Fode Konate ten goal khat

ṭheuh khungin Turkey lamin a chhanletna an nei thei lo.