World Cup-ah Wales tan hmun awm lo

Cardiff City Stadium-ah Wales-in 2018 FIFA World Cup qualifier match hnuhnung khelin Republic of Ireland chu 1-0 a an hneh loh avangin Russia ram an pan ve thei dawn lo. Group D aṭangin Georgia hnehtu Serbia chu hmahruaitu an ni a, Republic of Ireland-in playoff an khel ang.

Bang rinawm

Republic of Ireland-in game plan fel tak an nei a, Wales lakah tlarhnung an rem phui. First half-ah Wales-in inkhel thunun mah se mikhual tlarhnung an paltlang thei lo.

Wales tana chhuanlam awm thei chu Gareth Bale tel lo a ni a, amaherawhchu Real Madrid forward tel hian Republic of Ireland-in kumin March thla khan an mualah an lo a chelh a, tun ṭumah hian Martin O'Neill hoten game plan ngai chiahin an chelh nawn.

Goal khat a tawk

Second half-ah Republic of Ireland an inringtawk a, an nawr ngamna rah an seng. Minute 57-naah Jeff Hendrick-a'n Wales captain Ashley Williams ball chhuhsakin a ball pek chu James McClean-a'n chakna goal khung nan a hmang.

Inkhel boruak a sang tak ni mah se inkhel level hniam chang a tam a, inkhel entute tan erawh hun tawp thlenga hlauthawng taka thlir tur a ni thung.

Wales kawng a tawp

2016 European Champion­ship-ah Wales-in semifinal hial an thleng a, amaherawhchu 1958 World Cup an khelh hnua khawvel huap football inelnaa tel an tumna erawh a tawp thung.

Wales boss Chris Coleman chuan, "Ireland-in game plan an neih kan ring sa a, an tum angin khelmual chhungah an rawn khel chhuak a, an thawhrah an seng a ni," tiin a khingpui a fak.

Coleman chuan sawi chhun­zawmin, "Minute 37-na leka Joe Allen inhliam kha kan tuar a, player 10 in goal venhim an tum vek avangin kan tan chuan a harsa bawk. Ka naute an theihna zawng zawng an chhuah vek a, kan duh thleng phak tura a ṭha tawk ta lo erawh a pawi ka ti. Qualifier tawp match liah vawi li chak a ngai a, chung zinga pathum chu chak mah ila a tawpah erawh kan tling ta bik lo a ni," tiin qualifier tir lama an chet ṭhat loh chu pawi a tih thu a sawi.

Republic of Ireland manager Martin O'Neill chuan, "An mualah ngei hnehna kan chang a nia, ka player-te hnathawh hi ropui tak a ni. Playoff kan thleng a, eng team pawh hmachhawn ila kan hun

ṭha neih bawhpelh loh kan tum ang," tiin a sawi.

Serbia an tling

Belgrade-ah Serbia-in Georgia lakah goal an khung lawk thei lo a, minute 74-naah substitute Aleksandar Prijovic-a'n goal awmchhun a khung.

Serbia hian kum 2010-a South Africa-ah inelna nghah a nih ṭum khan a vawi khat nan World Cup an khel a, tun hi an vawi hnih telna tur chiah a ni.

Serbia coach Slavoljub Mus­lin chuan, "Georgia hneh an harsat ka ring sa a, rin lawk ang chiah a ni. First half-ah an khel ṭha zawk a, half time lai khan goal venhim ṭhulh si lo a, goal nawr na turin ka fuih a ni. World Cup khel tura kan tlin theihna chhan chu player-te an ni a, mipuiin an hna ṭha takin an thawk bawk. An chungah kan lawm hle a ni," tiin a sawi.