World Cup khel tur ram tê ber Iceland
Iceland ram mipui zawng zawng chu 334,252 vel chauh an ni a, Aizawla mihring cheng zat nen an inzat thuak ang. Europe-a ram pakhat, (39,682 sq mi) chauh a zau hi nakkum FIFA World Cup-ah an inlan dawn. Football inelna lian leh ngaihhlut berah an vawi khat telna tur niin inlan thei ram te ber an ni ang - mipui maktaduai khat awm tling lo ram zinga World Cup inpet tling hmasa ber an ni bawk.
Thawhṭanni zan khan Iceland hian an mikhual Kosovo chu 2-0 in an hneh a, Everton player thar Gylfi Sigurdsson leh Burnley midfielder Johann Gudmundsson ten goal an khung. Sigurdsson hian chawlhlawk hma deuhin goal hmahruai a khung bakah minute 68-naah an goal hnihna a siamsak bawk. Laugardalsvollur stadium-ah hamrik hnuhnung a ri a, Iceland ram mipui biangah lawm avangin mittui a luang.
Iceland hi Group I-ah awmin qualifier match 10 an khelhah ṭum sarih an chak a, vawi hnih chak loin ṭum khat chu an khingpuite nen an inhnehtawk. Point 10 hmuin group hmahruaitu an ni a, an hnuai chiahah playoff khel turin Croatia an awm. Ukraine, Turkey, Finland leh Kosovo tan Russia ticket a awm ve lo.
Russia ticket
Iceland hian nikum khan a vawi khat nan major tournament an khel a, European championship-ah quarterfinal lutin khawvel an barakhaih. Euro 2016-ah khan football ngaina ram England chu last 16 aṭanga pet chhuakin a thlengtu France an ngam lo thung. England an hneh aṭanga thla 18 pawh a liam hmain World Cup khel turin an tling leh ta.
Euro 2016-ah khan ram 24 an inlan a, European ram bik chauhte inelna a nih avangin tlin a harsa lutuk loa ngaih a ni. Mahse, France pan tur khan Netherlands an nek chhuak thei. Tun ṭum qualifier-ah pawh World Cup semifinalist Croatia leh Turkey te an hneh thei a, tuna an dinhmun thleng tur hian vanneihna an neih bakah an thiam tih chu a chiang tawk.
Iceland coach Heimir Hallgrimsson chuan, "Euro 2016 zinkawng a tawp hnua rilru intuaithar leh kha hna hautak a ni a, hun harsa kan paltlang thei hi ka lawm hle. Tunah hian kan tum ram kan thleng ta tihna a la ni lo a, ka duh leh tum ber hmun thleng turin zinkawng hautak kan hmachhawn zui dawn tihna a ni," tiin a sawi.
Hallgrimsson chuan sawi zawmin, "Kan awmna group kan hriat tirh khan rinkai ber kan ni lo, khawvel khan Croatia, Turkey, Ukraine leh Finland te kha kan chunga awm turin an ring. Mahse, kei leh ka player-te hnungah ram mipui an ding tlat a, beiseina meichher kan neih chu mit loa kan chhawm nun tlat avangin tun hun hi kan thleng a ni," a ti.
Euro 2016 lai kha chuan kum 50 mi Hallgrimsson leh Lars Lagerback ten Iceland team hi an enkawl dun a, Euro zawh hnu aṭang khan Hallgrimsson hian amah a kaihruai chhunzawmin match 15 a khelh puiah ṭum 10 hnehna a chanpui thei, tunah hian world ranking-ah 22-na an ni mek - Vestmannaeyjar, Iceland a piang Hallgrimsson hi football coach a nih bakah dentist (Ha doctor) a ni bawk!
Lawmpuina
Kosovo coach Albert Bunjaki chuan Iceland-in World Cup an khel tur chu ram dang tan entawn tlak leh inzirna tur ṭha tak a nih thu a sawi. Bunjaki chuan, "Iceland team ka lawmpui a, kan tan entawn tur ṭha min hnuatchhiah a ni," a ti. Kosovo-ah hian Iceland aiin mipui a let rukin an tam zawk.
Bunjaki chuan sawi zawmin, "Iceland hian a bik takin ram te zawkte tan entawn tur min siamsak ṭha hle. Team ṭha tak an indin thei a, an inlungrualin nakin hun tur pawh an thlir tel a ni," tiin an ngam loh ram chu a dah sang thiam hle.