Rafael Nadal dahsangtu Federer

Mipa singles huanga Grand Slam nomawi chawi hnem ber Roger Federer chuan 'King of Clay' tia an sawi ṭhin Rafael Nadal chu clay huangah chiah ni loin tennis player ropui ber pakhat a nih thu a sawi chhuak. Federer leh Nadal te hi tunkar chhunga khelh tur Shanghai Rolex Masters-ah an inlan dun dawn a ni.

Grand Slam vawi 19 champion tawh Federer chuan a elpui Nadal chungchang sawiin, "US Open nomawi a chawi a, tun hnaiah China Open title a la leh bawk, hard court-ah pawh player ṭha bik a nih zia a lantir a, kumin Australian Open final-ah an invaw thleng thei a ni," tiin tun season chhunga Nadal chet dan chu ropui a ti hle.

Tennis inelna ropui chhawp chhuaktu Federer leh Nadal te hi vawi 37 an inhmachhawn tawh a, Spanish star Nadal hian record nei ṭha zawkin 23-14 in hma a hruai. Swiss star Federer hi khawvel player ṭha bera ngaih ni mah se a vanglai pawhin Nadal hi a hneh hleithei lo a ni.

World number 2 Federer chuan tunkar chhunga inelna an hmachhawn tur thlir lawkin, "Season kan khar hnai a, nakkum inbuatsaihna a ni chho deuh vek tawh. Shanghai Masters khel turin inbuatsaihna ka nei ṭha a, result neih ṭhat theih ngei pawh ka inbeisei," tiin a sawi.

Kum 36 mi Federer leh world number 1 Nadal te hi kum 10 chuang chu tennis court chhungah an inel tawh a, an thiamna leh theihna a san bakah an nungchang vangin player naupang zawkte tan entawn tlak an ni - an pahniha Grand Slam title an lak tawh belhkhawm chu 35 a ni.