Khawzawlah Zote Honda MPL9 khelh a ni dawn ta

Zote Honda Mizoram Premier League Season 9 chu vawiin aṭangin KzDFA ground, Mualvawmah khelh a ni dawn. MPL hi Lunglei, Champhai, Serchhip leh Kolasib-ah te khelh a ni tawh a, Mizoram chhunga football inelna sang ber hi Khawzawl mipuiten an khaw tualah an thlir dawn e.

Vawiin chhun dar 12:00 hian I Day Football champion Mizoram Police leh kai thar FC Bethlehem te an inkhel dawn a, tlai dar 3:00-ah champion lai leh hmahruaitu Aizawl FC-in an hnuai chiaha awm Chhinga Veng te an hmachhawn ang.

Police, Bethlehem, Aizawl FC leh Chhinga Veng te hian Thawhlehni khan Aizawl aṭangin Khawzawl hi an pan a, kawng a ṭhat loh avangin zin nan hun an hmang rei a, zan rei tawh lamah an thleng.

Zirtawpnia inkhel tur Electric Veng, FC Venghnuai, Chanmari FC leh Chawnpui FC ten nimin khan Aizawl chhuahsanin Khawzawl an pan ve bawk.

Khawzawl mipui hian MPL hi kan hlut a, entu pawh an ṭhat viau ka ring. DFA lam pawhin theihtawp chhuahin kan inbuatsaih a, hnatlang pawh ṭum thum kan nei. Team pariatte hi veng hrang hrangah an thleng a, local manager pahnih ṭheuh kan pe. MPL kan thlen avangin DC hnen aṭangin chair 50, Pu W. Chhuanawma (Vaivakawn, Aizawl) hneh aṭangin chair 30 leh Khawzawl EcoSite hnen aṭangin chair 30 kan dawng a, an chungah kan lawm takzet a ni. - TC Lalngaihawma, Khawzawl DFA Secetary

Khawzawl hi football ngaina tak khua kan ni a. MPL Board, MPL Team leh Zonet Cable TV ten sum leh tha tam tak senga MPL9 Round 7 Khawzawl DFA Playground Mualvawl-ah inkhel an rawn nghat hi kan lawm tak zet. Khawtlang mipuiten an nghakhlel a. Kan inbuatsaihna kawngah Khawzawl DC, Head of Office leh MNF Block hruaituten nasa takin min ṭanpui a. He MPL Match inkhel tur hi a hmunah leh TV lamah pawh lo en turin Mizo mipui zawng zawngte kan sawm a ni. - Lalnunenga, Khawzawl DFA President